Dantza, herriak gerturatzeko
Kemen Dantza Taldearen harrobiko zaharrenak elkartrukea egiten ari dira Marboleny talde katalanarekin. Joan den astean Gironan egon ziren; honetan, katalanak etorri dira.
Adaxkako kideak, Hondarribia Dantzan jaialdiko igandean
Elkartrukearen bigarren zatia da. irudian, Adaxkako dantzariak, Katalunian.
Mikel Button: “Asmoa da jai giroa sortzea Euskal Herriko eta Kataluniako dantzekin”
Zergatik aukeratu duzue Marboleny taldea elkartrukerako? Les Presses herrikoa da Marboleny, Garrotxa ingurukoa, Olot ondoan dagoen herria. Duela sei urte han egon ginen, 2011 urtean, azken urteetako elkartrukeekin hasi ginenean. Lehenengoa Les Pessesen egin genuen, aurten bueltatu gara hara, eta beraiek etorriko dira hona [elkarrizketa asteartean egin zen]. Zikloa berriro hasteko modua izan daiteke. Ez da oporraldia, edo bai? Zentzu batean bada, kanpora goaz, ondo pasatzera… baina Euskal Herriko ohitura dantzatuak kanpoan erakustera ere bagoaz, nolabait Euskal Herria ordezkatzera, edo saiatzera behintzat. Beste herrietan ezagutu dezaten hemen egiten duguna, batetik, eta kanpoan egiten dutena ezagutzera, bestetik, batez ere dantzen bidez beste ohiturak ezagutu, beren bizimodua, eta noski, lagunak egiteko ere, harreman oso estuak egiten direlako elkartrukeetan. Aste honetan, hiru egunetan hiru saio izango dira. Antolaketari dagokionez, Hondarribia Dantzan jaialdiarekin alderatu daiteke? Desberdina da, hasteko, dimentsioagatik. Hondarribia Dantzanek astebete hartzen du, baina ekintza zehatzak dira, ordutegi zehatz batekin, demagun zazpietatik bederatzietara, eta hori bukatuta hurrengo egunera arte ez dago ezer. Elkartrukeak duena da lau bat egunez, nahiz eta publikoari begira jarduera zehatzak izaten diren, 24 orduz egon behar garela haiekin, eta hori, lan karga aldetik, nabari da. Baina pozik egiten dugu. Kemenek antolatu baina Adaxkarena da elkartrukea, ez? Elkartrukea, bere horretan, Adaxkakoekin egiten dugu, harrobiko dantzariekin, harrobiko zaharrenekin. Batzuentzat ziklo bukaera da, Adaxka elkartruke batekin bukatu eta hortik Kemenera salto egiteko. Aurtengo berezitasun bat da Kemenen, helduon dantza saio bat sartu dugula egitarauan [atzokoa]. Beste urteetan, kanpotik etortzen zirenak penaz geratzen ziren, ez gintuztelako gu ikusten dantzan. Eta erabaki genuen saio bat, herriari irekita, baina batez ere beraientzat egitea, Marboleny taldeko dantzariei eskainia. Gaur, Hondarribian ere, Adaxka eta Marbolenykoen txanda, kalejira lehenik, eta agerketa gero, Santa Maria Madalena plazan. Eta bihar Irunen, Euskal Herriko eta Kataluniako erromeria… Guk erromeriak antolatzen ditugunean, musika jo eta dantzak azaltzen ditugu, eta nahi dituenak dantzatzen ditu. Guk hori egingo dugu gure zatian, eta haiek ere antzerako zerbait egingo dute haienean. Asmoa da denen artean jai giroa sortzea, Euskal Herriko eta Kataluniako plazako dantzekin, bakoitzak bere herrikoak azalduz, eta besteenak ikasiz eta dantzatuz. Oporraldian egiten duzue elkartrukea eta abuztuan beste bidai bat duzue. Helburu berarekin? Bai, Italiara goaz, Veneziatik iparraldera dagoen Blessano herrira, jaialdi batera. Kasu honetan Kemeneko kideak soilik, helduak, joango gara Italia aldera. Formatua desberdina da, gu kanpora goaz, gero ez dira etortzen Italiatik hona. Baina helburua berbera da, euskal kultura munduan zehar zabaltzea, gure eskualdeko izena ezagutaraztea, gure dantzak.
Kemen Dantza Taldearen saioa, iazko Hondarribiko jaietan
