Hondarribiarrarekin batera, goi mailako beste hainbat dantzari elkartuko dira larunbatean Itsas Etxean. Sarrerak azkar ari dira saltzen.
Itziar Mendizabal, London Royal Balletaren ikuskizun batean
Londresko Royal Balleteko bakarlari Itziar Mendizabal hondarribiarrak dantza erakustaldia emango du larunbatean bere herriko Itsas Etxea Auditoriumean. Goi mailako dantzariez inguratuta ariko da Mendizabal: Bordeleko Opera Nazionaleko Balleteko Alvaro Rodriguez Piñera eta Claire Teisseyre, Portugalgo Companhia Nacional de Bailadoko dantzari nagusi Carlos Pinillos eta Filipa de Castro lehen dantzaria, Jean-Sebastien Colau frantsesa Kanadako Balleteko bakarlari ohia, eta Ryoichi Hirano Londresko Royal Balleteko zuzendaria izango ditu ondoan.
Egitaraua ere ez da edonolakoa izango (ikusi behean). Dudarik gabe, azken urteetako kultur programazioaren barruan ekitaldi nabarmenenetako bat izango da larunbateko dantza gala.
20:00etan hasiko da ikuskizuna eta sarreren prezioa 36 eurokoa da. Erritmo onean saltzen ari dira. Arma Plazan ostirala arte salgai egongo dira eta Interneten,
Kutxabanken salmenta atarian. Larunbatean Itsas Etxeko leihatila irekiko dute emanaldia hasi baino bi ordu lehenago, baina sarrera gutxi batzuk saltzeko izango da.
Ibilbide paregabea
Bigarrenez dantzatuko du Mendizabalek Itsas Etxean; 2012ko uztailean egin zuen lehen aldiz. Ordurako London Royal Balleteko bakarlaria zen, 2010ean aukeratu baitzuten postu horretarako. Elvira Ubierna eta Victor Ullateren eskoletan hasi zen, eta Ullateren konpainian sakondu zituen ikasketa profesionalak.
Londresen aritu aurretik, Zurichen (2003tik, demi bakarlari gisa) eta Leipzigen (2006tik, bakarlari) dantzatu zuen. 2008an lehen dantzari maila jaso zuen.
Egitaraua
Piaf a Deux
- Koreografia: Paul Chalmer
- Musika: Edith Piaf
- Itziar Mendizabal eta Jean-Sebastien Colau
Fauno baten siestarako preludioa
- Koreografia: Serge Lifar – Vaslav Nijinsky
- Musika: Claude Debussy
- El Fauno: Alvaro Rodriguez Piñera
Zisneen lakua. Zisne beltza, III. aktoko binakako urratsa
- Koreografia: Marius Petipa
- Musika: Pyotr Ilyich Tchaikovsky
- Odile: Filipa De Castro. Sigfrido printzea: Carlos Pinillos
Fellini Rêves. Pink Duet
- Koreografia: Fabio Lopez
- Musika: Johann Sebastian Bach
- Claire Teisseyre eta Alvaro Rodríguez Piñera
Zisnearen heriotza
- Koreografia: ?Mikhail Fokine?
- Musika: ?Camille Saint-Saëns?, (Le cygne de ?Le Carnaval des animaux?)?
- Itziar Mendizabal
Viscera
- Koreografia: Liam Scarlett
- Musika: Lowell Liebermann
- Ryoichi Hirano eta Itziar Mendizabal
La Bayadera. Itzalen erreinua aktoko binakako urratsa
- Koreografia: Marius Petipa
- Musika: Ludwig Minkus
- Nikiya: Claire Teisseyre. Solor: Alvaro Rodriguez Piñera
Cantata
- Koreografia: Mauro Bigonzetti
- Musika: Assurd
- Filipa De Castro eta Carlos Pinillos
Winter Dreams
- Koreografia: Sir Kenneth MacMillan
- Musika: Pyotr Ilyich Tchaikovsky
- Ryoichi Hirano eta Itziar Mendizabal
