EGO bueltan da Itsas Etxera

Euskal Herriko Gazte Orkestrak Hondarribian abiatuko du udako kontzertuen bira. Korsakoven eta eta Bernsteinen obrak interpretatuko dituzte.

Asier Perez-Karkamo

Hondarribia

2017/07/14

Euskal Autonomia Erkidegoko hiru hiriburuetan eta Hondarribian joko du EGOk

Datorren asteartean hasiko da Euskal Herriko Gazte Orkestraren (EGO) udarako kontzertuen bira, eta Hondarribian hasiko da, Itsas Etxea Auditoriumean. Aurreko urteetan bezala, lau kontzertu emango ditu EGOk udaran, EAEko hiru hiriburuetan bana, eta Hondarribian beste bat. Juan Jose Oconen zuzendaritzapean, Nikolai Rimski-Korsavov errusiarraren Scheherezade eta Leonard Bernstein estatubatuarraren West Side Story-ko dantza sinfonikoak interpretatuko dituzte aurten. Hondarribian hasiko da bira, asteartean (hilak 18), 20:00etan. Sarrerak dagoeneko eros daitezke Arma Plazako turismo bulegoan, eta Interneten (komisioa ordainduta); prezioa 12 eurokoa da, 5 eurokoa 18 urtetik beherakoentzat. Asteartean Itsas Etxeko leihatilan jarriko dituzte azken txartelak salgai, arratsaldeko seietan. Itsas Etxeko emanaldiaren ondoren, Donostiako Viktoria Eugenia (asteazkenean), Bilboko Euskalduna Jauregia (ostegunean), eta Gasteizko Principal Antzokia (ostiralean) bisitatuko ditu Euskal Herriko Gazte Orkestrak.

20 urteko ibilbidea

Dagoeneko hogei urte igaro dira Euskal Herriko Gazte Orkestra Fundazioa sortu zenetik. Bi hamarkadetan musika sinfoniko eta ganbera-musikako 150 kontzertu baino gehiago eskaini ditu EGO orkestrak, nazioarteko biretan hainbat herrialde bisitatu ditu, 120.000 ikus-entzule baino gehiago izan ditu, eta 1.200 ikasle baino gehiagok izan dute EGOn jotzeko aukera. Fundazioak gogorarazi duenez, euskal gazte instrumentistek orkestra formazioa jasotzeko baliabidea izatea bilatzen du EGOk: “Helburua orkestra-prestakuntza ona ematea eta instrumentista gazteen alderdi artistikoa eta giza esparrua sustatzeko egitura sendoa izatea da, eta aldi berean zubi izatea, maila artistiko handiko zubia, mundu profesionalera iristeko”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.