Juncal Alfonsoren lanak Otzazkin, ostegunera arte

Artista irundarraren 21 artelan ikus daitezke Damarri plazako galerian, akrilikoak eta collageak batez ere. Ostegun eguerdian jasoko ditu.

Asier Perez-Karkamo

Hondarribia,Irun

2017/07/10

Ostegun eguerdira arte bisitatu eta eros daitezke Juncal Alfonsoren lanak Otzazkin

Juncal Alfonso irundarraren lanak ikusi daitezke egunotan Damarri plazatxoko Otzazki arte galerian. Irungo Udal Marrazketa Akademiako irakaslea da Alfonso, eta Otzazkiko artista-taldetik gehien mugitzen den kideetako bat; berari zor zaio Damarrin hileroko bigarren igandetan egiten hasi diren Garabateando aire libreko tailerra. 21 obra guztira, batez ere akrilikoak eta collageak, horiek bildu ditu erakutsi eta saltzeko; batzuk dagoeneko erreserbatuta daude. “Oro har, figurazioa eta abstrakzioa nahasten ditut, artelanak grafiekin, kolore orbanekin, lerroekin osatuz”, esan du egileak. Otzazkirako aukeratu dituen lanetako asko paisaiak dira, “edo paisaien nire interpretazioak, Jaizkibelen, Aiako Harrian, Artikutzan, eta abar eginiko paseoetan ateratako argazkietatik abiatuta egiten ditudan interpretazioak”. Egun gutxi geratzen dira Juncal Alfonsoren erakusketa ikusteko. Izan ere, Hondarribia Blues jaialdiari lotutako ekintza artistiko bat antolatzen ari dira lehen aldiz —hurrengo egunetan hemengo dugu horren berri—, eta bertan parte hartzeko ostegun eguerdian itxiko du erakusketa. Irundarrak aurreratu duenez, zortzi-hamar bat artista elkartuko dira blues jaialdia marrazteko: “Bakoitzak nahi duena marraztuko du, nahi duen kontzertuan eta nahi duen moduan. Baldintza bakarra zera da, igande eguerdirako bukatu behar ditugula lanak, igande eguerdian lan horiek Bentako karpetan erakutsiko ditugulako”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.