Batetik, hondartzako kirol azpiegiturak eta materiala erabiltzeko aukera dute gazteek, eta bestetik, antolatutako jardueretan parte hartu dezakete.
Gazteen euren arteko txapelketak antolatzen dituzte, batez ere boleikoak eta futbolekoak
Abian da Hondar Kirolak, Gazteria Departamentuko Prebentzio Komunitarioko Udal Zerbitzuak antolatuta hondartzan burutzen den aisialdi programa. Asteartetik ostiralera egingo dute, arratsaldeko lauretatik zortzietara —antolatutako jarduerak 17:00etatik 19:00etara—, bihar hasi eta abuztuaren 4ra bitarte. Aurten hamahirugarren ekitaldia beteko du Hondar Kirolak programak.
Helburua, aisialdi osasuntsuan oinarritutako gazteei topaketa eta parte-hartze esparru bat eskaintzea da. Programa debaldekoa da, edozeinek gaztek har dezake parte, bertokoa ala bisitaria izan.
Bi aukera eskaintzen ditu programak. Batetik, Prebentzio Komunitarioko zerbitzuak hondartzan muntatu dituen kirol azpiegiturak erabiltzeko eta kirol materiala maileguan hartzeko aukera dute gazteek. Eta, bestetik, antolatutako jardueretan parte hartu dezakete. Ekintza horietako batzuk aldez aurretik antolatuta daude (ikusi zerrenda, behean), baina beste batzuk, biltzen diren gazteek beraiek prestatzen dituzte, gazteriako teknikarien laguntzarekin. Batez ere, futbol eta hondartza-bolei partidak eta txapelketak antolatzen dituzte.
Aurreko urteetan bezala, informazio etxola bat kokatu dute Hondar Kirolak programaren instalazioen ondoan. Bertan, programari buruzko xehetasunak, jardueren egutegia, eta tarteka antolatzen diren beste txapelketei buruzko informazioa banatuko dute, besteak beste. Besterik behar duenak, 943 11 40 00 telefono zenbakian jasoko du.
Hondar Kirolak. Jarduerak
Uztailak 12
- Xake erakustaldia, Hondarribia-Marlaxka elkartearen eskutik.
Uztailak 13
- Limitis Forum Kirol Eguna. Euskal Herriko 70tik gora gaztek parte hartuko dute..
Uztailak 14
- Hondartza-bolei txapelketa
Uztailaren 19tik 21era
Hondarribia Cup futbol txapelketa, animatzaileek gazteen laguntzarekin antolatuta.
Uztailak 27
- Hondartza-bolei txapelketa
- Hondartza-hockey erakustaldia, Errealeko belar-hockeyko emakume taldearen eskutik.
Abuztuak 3
- Hondartza-futbol erakustaldia, Oiartzun Kirol Elkarteko futboleko emakume taldearen eskutik.
