Berriz ere borrokarako prest
Azken urteetako balentriak errepikatzeko asmoz ekingo dio bihar Hondarribiak Eusko Label Ligari; zuhurrak baina baikorrak dira, nahiz eta lehiaren maila oso altua izango dela aurrez jakin.
San Joan bezperan aurkeztu zituzten aurten lehian ariko diren Hondarribia Arraun Elkarteko bi eskifaiak.
Mikel Orbañanos (Entrenatzailea): «Behean ere borroka handia izango da, eta horrek eragingo du goikoengan»
Donibanen segundo bakarreko aldeaz irabazi diozue Urdaibairi. Aurten ere bion arteko lehia estua ikusiko delaren seinale?
Oraindik goiz da esateko, baina iruditzen zait baietz, hor aurreko lehian, bai Urdaibai, eta bai gu ariko garela, eta Orio baita ere hor aurrean sartzeko taldea izango dela iruditzen zait. Gero ez dugu ahaztu behar Kaikurekin, azkeneko urte hauetan ohorezko txandan egon dela beti, eta Zierbena ere indartuta dago.
Hala ere, ez nuke prezipitatu nahi, oraindik goiz delako eta iruditzen zaidalako traineru askok izango dutela aukera hor aurrean ibiltzeko.
Bihar hasiko da liga. Zein helburu nagusi ezarri dituzu aurtengo denboraldirako?
Azken urteei begiratuta, iruditzen zait maila txukuna emateko gai izango garela. Lan ona egin dugu neguan eta, taldean aldaketa handirik ez dugula ikusita, normalean behintzat, maila berdintsu samarrean ibili beharko genuke.
Helburu horiek lortze bidean oztopo nagusiak zeintzuk izan daitezke?
Hau kirola da, itsas zabalean jokatzen den kirola, eta gerta daitezke gauza asko.
Egia da, hala ere, liga bat irabazten dela beti udara guztian erregularrena izan ahala, eta udara guztiko onena izanda. Zentzu horretan, garrantzitsua da ondo hastea, baina baita ondo jarraitzea eta bukatzea ere. Azkenean estropada denak dira garrantzitsuak.
Sorpresetarako tarterik izatea aurreikusten duzu?
Ez. Beti egoten dira sorpresak eta aldaketak, baina, nire ustez, aurreko urtekoaren antzeko liga izango da.
Eusko Label Ligatik ez erortzeko borroka latza aurreikusten da.
Bai, beherakoa, oraindik ere zailagoa iruditzen zait. Traineru asko ikusten ditut maila oso txukunean eta inor ez dut ikusten behera jaisteko txartela askorekin. Behean ere borroka handia izango da, eta horrek eragingo du goikoengan ere bai, beherakoak ez direlako erraz erlaxatuko. Aurrekoren batek estropadaren batean huts egiten badu, asko sufritu dezake, dudarik gabe, beherakoek ere, maila txukun samarra emango dutelako.
Hamaseigarren denboraldia duzu Hondarribian. Ez da marka makala.
Egia esan, hasieratik oso jende jatorra topatu dut. Beraiek ere gustura daude nik egiten dudan lanarekin. Denon lorpena da. Arraunlari batzuk urte asko daramate nirekin, zuzendaritzako kideek zer esanik ez, musu-truk hainbeste urtean, eta baita presidentea Joxemi Elduaien eta Joseba Amunarriz patroia ere. Nire izena aipatzen dute, baina jende asko dago nirekin elkarlanean, eta horien guztien lana dago lortutako meritu guztien atzean.
Aner Etxart, (Entrenatzailea): «Berriz ere traineru bat martxan jartzea, horixe helburua»
KAE1 Liga martxan da. Nola ikusten duzu taldea?
Taldearekin, orokorrean, oso gustura. Egia esan, azkeneko postuetan ibiliko ginela bagenekien, jaitsiera postu horiek saihesten, eta taldearen erantzuna oso ona izaten ari da. Estropadetan primeran ari gara ateratzen, eta gero, gure gorabeherak baditugu. Batzuetan hobeto moldatzen gara, besteetan okerrago, batez ere, itsaso zailetan, baina gure lana egiten ari gara.
Denboraldirako helburu nagusiak zeintzuk dira?
Taldea osatzea. Nahikoa justu ibili gara jendez. Jende berria sartu da, eta jende berri hori taldean egokitu, bloke bat landu eta berriz ere traineru bat martxan jartzea, horixe helburua.
Gero, badakigu, KAE1 Liga oso zorrotza dela, eta ahalik eta txukunen moldatu nahi dugu. Horretan ari gara.
Jaitsiera postuak saihesteko borroka horretan zeintzuk aurreikusten dituzu kontrario zuzenak?
Ikusi dugu Arkote dagoela momentuz gertuen, igo berria delako, eta beraiek ere horretan ari direlako, ligara egokitzen. Gero ere Pedreña, Portugalete… horiek dira momentuz gertuen ibili direnak. Gero ikusiko da, liga aurrera doan bezala, beraiek gorantz doazen, edo beste talderen batek behera egiten duen.
Oraingoz, behintzat, badirudi zuenean Donostiarra izango dela lider argia. Espero zenuten?
Bai. Urte hasieran ikusi zen, egin zituzten fitxaketekin eta, taldea TKErako bide hori hartzera bideratuta zegoela. Estropadak hasi dira eta erakusten ari dira bide horretan ondo ari direla.
Urte askoan arraunlari aritu eta gero hirugarren urtea duzu entrenatzaile gisa. Zer moduz?
Nahiko gustura. Duela hiru urte hasi nintzenean, taldea beherago zegoen. Bizi izan dut momentu oso ona, estropada asko irabaziz. Liga irabazi genuen, igoera bat… Aurreko urtean ere talde indartsua genuen, eta ondo moldatu ginen erdialde horretan. Aurten, berriz, berritze prozesu batean gaude, eta horretan ere oso gustura. Agian, aurtengo hau izango da gustuen aritu naizen urtea, gazteekin, beraien jarrera oso ona izan delako.
Denboraldiak aurrera egin ahala taldeak koska bat gora egingo duela uste duzu?
Zergatik ez. Azkenean horretarako ari gara lanean. Taldea ikasten ari da eta saiatuko gara arerio bat atzean uzten, eta behintzat play-offetako aukera hori edukitzen, kategoriari eusteko. 
