Hondarribiko Erdi Aroko Azoka egingo dute asteburuan Alde Zaharrean. Alde Zaharra prest dago ehunka bisitari jasotzeko.
Maria Serrano Turismo arloko zinegotzia, aurkezpenean
Olatz Zugastik kontzertua emango du larunbatean Hondarribian, asteburuan zehar egingo den Erdi Aroko Azokaren barruan. Hilaren 14ra luzatuko den
erdi aroko pintxo lehiaketaz aparte, hirigune historikotik aterako den azokako ekitaldi bakarra izango da. Nolanahi ere, Erdi Aroko Azokaren eragin ekonomikoa herri osora zabaltzen dela esan du gaurko aurkezpenean Maria Serrano Turismo zinegotziak: “Batez ere Alde Zaharrean eragiten du, baina baita Portuan ere. Hotelek urte hasierarako jakin nahi izaten dute Erdi Aroko Azoka noiz izango den”.
Itsas Etxea Auditoriumean abestuko du Zugastik larunbatean, 20:00etan. Sarreraren prezioa 8 eurokoa da, erdia 18 urtetik beherakoentzat. Emanaldi hori izango da asteburuko berrikuntza nagusia, berritzeko beharrik ez baitu azokak arrakastatsua izateko. Garai bateko ofizioak, titiriteroak, juglareak, saltinbankiak… “erdi aroan merkatu garrantzitsua izan zen Hondarribia, eta garai hura irudikatu nahi dugu asteburuan”, azaldu du zinegotziak. Hori bai, eguraldiak laguntzen badu, hobe. Serranoren hitzetan, honelakoa da azokara ahalik eta jende gehien hurbiltzeko behar den eguraldia: “Egun erdi lainotua, euririk gabe, baina eguzkitsua ere ez, bestela jendeak hondartzarako bidea hartzen du”.
Aintzinako ofizioen erakusleiho polita izaten da Erdi Aroko Azoka
Orotara, 30 saltzaile elkartuko ditu merkatuak, gehienak Hondarribia, Baiona eta Iruñekoak, ondare kulturala sustatzeko xedea duen Creacity programaren barruan elkartzen diren hiru hiribilduak. Zinegotziak azaldu duenez, Gipuzkoa plaza inguruan eta Kasino Zaharrean jarriko dira saltzaileak. “Urtetik urtera geroz eta gehiago zabaltzen ari da azoka”, erantsi du. Ordutegia ohikoa izango da, 10:00etatik 14:00etara eta 17:00etatik 21:00etara, bi egunez.
Azokari lotuta, iazko
argazki lehiaketako lanen erakusketa bisitatu daiteke Arma Plazan, eta erdi aroko pintxoak dastatu daitezke hamar jatetxeetan. Batera edo bestera hurbiltzeko asmoa duenak, astean zehar errazago izango da, asteburuko bisitarien uholdearen zain egon gabe.
