Hondarribia Urdaibairen aurretik Mutrikun, Orio B nagusi
Eguraldi aldaketak ezustekoa eragin du Mutrikuko estropadan. Orioko gazteek irabazi dute, Hondarribia bosgarren izan da, eta Urdaibai zazpigarren.
Orio B, Kaiarriba eta Santurtzi, hori izan zen larunbatean Mutrikun jokatu zen estropadaren ezohiko podioa. Orio Arraunketa Elkarteko gazteez osaturiko eskifaiak irabazi zuen Mutrikuko Udalaren XVIII. Ikurriña (21.25,57), eguraldi aldaketak kalte egin baitzien laugarren txandan bogatu zuten lau faboritoei. Ama Guadalupekoa bosgarren sartu zen, 7 segundora, eta Urdaibai zazpigarren, 16ra. Beste biak okerrago aritu ziren, Kaiku hamabigarren, eta Ondarroa hamalaugarren.
Hortaz, zapore gazi-gozoa izan zuen Mutrikuko estropadak hondarribiarrentzat. Gozoa, Urdaibairen aurretik sartu zirelako —9 segundo aurretik—, eta gazia, itsasoaren zakartzeak banderarik gabe utzi zituelako.
Orio Bk irabazi zuen Mutrikuko bandera, ezustean (arg: @bermeoarraunargazkiak)
