Denboraldi bikainari bere neurriko itxiera

Hondarribia Futbol Elkarteko jokalari eta tekniko guztiak omenduko dituzte bihar, Ohorezko Mailako taldearen azken partidan.

Asier Perez-Karkamo

Hondarribia

2017/05/26

Salbazioa lortuta iritsi da azken jardunaldira lehen taldea

Hondarribia Futbol Elkarteak ospakizuna du bihar larunbata. Ohorezko Mailako taldeak salbazioa lortu zuen joan den asteburuan, azken bederatzi partidetan zazpi garaipen eta bi berdinketa erdietsita. Bolada historikoak ospakizuna merezi du, eta Hernaniren aurkako azken partida probestuko dute. Baina beheko mailetako kirolariei ere aitortza egin nahi die klubak. “Denboraldian zehar sekulako lana egin dute eta horrek gure txalo zaparrada merezi du”, adierazi dute elkarteko arduradunek. Besteak beste, mailaz igo eta finala jokatu duen Haurren Lehen Mailako taldeak, liga hirugarren bukatu duten neska kadeteek, datorren urtean ohorezko izango diren eta igandean Tolosaren aurka finala jokoan izango duten mutil kadeteek, eta, Hondarribia Futbol Elkartea osatzen duten beste guztiek, jokalari entrenatzaile eta teknikoek, denek jasoko dute zaleen berotasuna. 17:30ean hasiko da Hondarribia eta Hernani taldeen arteko partida, eta horren aurretik izango da omenaldia. Partida bera ez da nolanahikoa. Hernanik liga izango du jokoan, eta Anaitasuna liderraren emaitza hobetu behar du horretarako. Hondarribiak, aldiz, bederatzigarren postua ziurtatu edo bat hobetu nahiko du, eta hamargarrenez jarraian galdu gabe bukatzea. Aurrez aurre Ohorezko Mailako bigarrena, Hernani, eta ligako azken zatiko talderik onena, Hondarribia FE. 90 minutuetan gertatzen dena gertatuta, denboraldi bikain bati bere neurriko itxiera emango do Hondarribiko Futbol Elkarteak. Zoriontzeko modukoa, bai horixe.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.