Blagan Eguna antolatzen ari dira ekainaren 3rako
Euskararen aldeko kalejira egingo dute ekainaren 3ko eguerdian, eta ahalik eta herritar gehien parte hartzea nahi du Blagan elkarteak.
Hondarribiko Blagan euskara elkarteak Blagan Eguna ospatuko du ekainaren 3an, Itxeki euskarari leloarekin. Festa mundiala egin nahi dute Arrantzale Auzoan, euskaldun ez direnak ere euskaraz blagan jartzeko modukoa. Egun osoko festa izango da, 11:00etan hasi eta gauera arte luzatuko dena.
Arrantzale Auzoan izango da Blagan Eguna, baina Portu osora kutsatu nahi dute. Hala, 11:00etatik aurrera musika animazioa izango da auzoan eta 12:00etatik aurrera irratsaioa eskainiko dute zuzenean. Herriko esatariek mikroa eskutan dutela, elkarrizketak, musika eta bestelakoak entzungo dira Blagan Egunerako propio prestaturiko irrati emanaldian.
Ekainaren 3rako prestatzen ari diren ekitaldi ikusgarrienetako bat euskararen aldeko kalejira izango da, Korrikaren antzera euskararen aldeko lekukoa kalez kale eramango duena. Herriko arraunlariek hasiko dute ibilbidea, 13:00etan, eta itsasoz Kai Zaharrera eramango dute lekukoa; hortik aurrera, herritar guztiei egin diete deia lekukoa hartzeko: “Abiyuan txaranga eta Erraldoi eta Buruhandiekin kalejiran eramango dugu Porturaino”.
Mosaikoa, euskararen egunari begira
Eguerdian, ekimen berezi baten aurkezpena egingo dute. Euskararen egunari, hau da, abenduaren 3ari begira, Itxeki euskarari mosaikoa egin nahi du Blaganek, eta 500 hondarribiarren argazkiak behar dituzte horretarako. Blagan Egunean aurkeztuko dute ideia, 14:00etan, bazkariaren aurretik.
Arrantzale Auzoan bertan bazkalduko dute, eta bazkari handia egin nahi dute. Hilaren 31 baino lehen erosi behar dira txartelak, San Pedro kaleko Blagan kafetegian edo Itxola paperdendan. Entsalada, paella eta postrea, hori izango da menua, eta prezioa 15 eurokoa, eta haurrena 8 euro.
Eta bazkalostean, festa, dantza gidatuak Ttipika taldearekin, aurrena, eta modu librean Hondarribiko Elektropatxarangarekin gero. Gauera arte luzatuko da lehen Blagan Eguna. Herritarrak piztu nahi dituzte, euskarari itxeki eta urte osoan eutsi diezaioten. Batez ere erabileran eragin nahi du euskara elkarteak, herritarrak blagan jarri, eta asmo horretan mugarri izan nahi du ekainaren 3ak.
Blaganeko kideak, Korrikaren egunean. Ekainaren 3an berriro eramango dute euskararen lekukoa
