Asturiagako segada argitzeko lan taldea sortu dute
Gaur, bilera irekia egingo dute Kultur Etxean. Duela 43 urte Jose Luis Mondragon arrasatearra eta Xabier Roke santurtziarra hil zituzten Hondarribian.
Hilaren 20an 43 urte beteko dira guardia zibilek eta Espainiako poliziek Jose Luis Mondragon 27 urteko arrasatearra eta Xabier Roke Mendez 21 urteko santurtziarra Hondarribiko Asturiaga hondartzan —Higer lurmuturraren ondoko badian— hil zituztenetik.
Gertakari hura argitzeko lan taldea eratu dute Hondarribian, eta gaur aurkeztuko dute, 19:00etan, Kultur Etxeko 103 aretoan. “Oso gutxi dakigu gertaera ilun hartaz. Guk dakigula ez da ez ikerketarik, ez epaiketarik egin. Jakin nahi dugu zer gertatu zen. Memoria berreskuratu nahi dugu”, adierazi dute deitzaileek.
Batetik, gertatu zena argitu, eta, bestetik, ekitaldi txiki bat antolatu, Asturiagan bertan hilaren 20an egiteko. Asmo horiekin sortu dute lan taldea eta asmo horiekin egingo dute gaurko bilera. “Interesa duen oro gonbidatuta dago”, gaineratu dute.
Hondarribiko Asturiaga hondartza, Higer farolaren ondoan
