Hondarribia-Katsikasen zozketako sarituen zerrenda
17.345 txartel saldu dituzte, hondarribiar bakoitzeko bana. 386 opari zozkatu zituen larunbatean Hondarribia-Katsikas Boluntario Taldeak.
386 opari, 386 saritu. Larunbatean egin zen Hondarribia-Katsikas Boluntario Taldearen zozketa, eta dagoeneko sarituen berri eman dute. Hona hemen sarituen zenbakiak eta oparien zerrenda:
Hondarribia-Katsikas sarien zerrenda
Bihar hasiko dira sariak banatzen, Puntaleko eskolan. Hilabetez ariko dira egunero, 09:00etatik 11:00etara eta 18:00etatik 20:00etara (ostegun, larunbat eta igandetan, goizez bakarrik). Sari bezala artelan, liburu edo kirolarien dohaintza bat egokitu zaionak, han bertan jasoko du oparia. Gainontzekoei txartel bat emango diete eta txartel horrekin dagokion establezimendura joan beharko dira. “Horrela, saria jaso duenak eman duenaren eskutik jasoko du saria”, azaldu du Maite Garcia elkarte solidarioko kideak.
Muraleko puskak, euro 1ean
Sariak banatzeaz gain, ostiralean Madalen Plazan sorturiko mural erraldoiaren zatiak saltzen ariko dira Puntaleko Eskolan. 100 lagun ingururen artean eraiki zuten murala, haurrek arratsaldean eta nagusiek gauez. Larunbat goizean zatitu zuten, 10×10 zentimetroko 800 pusketan. Zati bakoitza euro 1ean saltzen ari dira eta bildutako dirua zozketarekin eta beste bide batzuekin lortutakoari batuko zaio, eta Hondarribia-Katsikas Boluntario taldeak Grezian abiatuko duten proiektua finantzatzeko balioko du.
Urte erdiko lanaren ondoren, zozketa pasatuta, proiektu hori prestatzen hasiko dira boluntarioak. Dagoeneko aurreratu dute osasunari eta elikadurari lotutako proiektua izango dela eta, ziurrenik, Kios irlan edo Tesalonikan gauzatuko dutela.
Ehun lagun ingururen artean margotu zuten errefuxiatuen aldeko murala, hainbat teknika erabiliz
