Besteen zain, liga bukatu du Ikasbasketek
Azken jardunaldian atseden izango du. Igoera faseko finalerdian San Ignacio Venueren kontra jokatuko dute hondarribiarrek.
Express Hondarribia Ikasbasket taldeak garaipena lortu zuen larunbatean Mutiloako (Nafarroa) Aranguren taldearen kontra 59-46 (25-21 atsedenaldian), eta Lehen Euskal Ligara igotzeko lauko finalaren zain geratu da. Azken jardunaldian atseden izango dute hondarribiarrek eta igoera fasea non jokatuko duten jakin gabe bukatu dute liga. Ganix Miron entrenatzailearen arabera, “azken garaipenarekin meritu handiko postuan eta igoera fasean gauzak ondo egiteko gogoz” bukatu du lehen fasea Hondarribiko taldeak.
Hori bai, finalerdian izango duten aurkaria dagoeneko ezagutzen dute: Logroñoko San Ignacio Venue Embalajes Blanco. Azken jardunaldiaren zain, Ikasbasket hirugarren dago sailkapenean eta San Ignacio laugarren. Azken partidan Logroñoko taldeak irabaziko balu, postuak trukatuko lituzkete bi taldeek.
Finalerdi gogorra espero da. Liga erregularreko lehen itzulian 3 puntugatik nagusitu ziren logroñoarrek; bigarren itzulian, Hondartzan, hondarribiarrak izan ziren nagusi, 18ko aldearekin. Liga erregularrean ikusitakoaren arabera, San Ignaciok eraso hobea du, baina aurrean Bigarren Euskal Ligako defentsa onena izango du. Ikasbasketek bere maila ematen badu, finalera sailkatzeko aukerak izango ditu, bestela ez.
Maiatzaren 6-7ko asteburuan jokatuko da lauko finala eta oraindik ez da egoitza zehaztu. Izan ere, asteburuan sailkapeneko lehen biek —Campus Promete eta Burdinola Getxo—galdu zuten, eta Lehen Mailara zuzenean igoko den taldea azken jardunaldian erabakiko da. Bigarrenaren etxean jokatuko da igoko den bigarren taldea zehazteko fase erabakigarria.
Etzi lagunartekoa Angelun
Aste honetan ez du ligako partidarik izango Ikasbasketek, baina atseden hartu ere ez dute egingo. Izan ere, lauko finala behar bezala prestatzeko, lagunarteko partida jokatuko dute hondarribiarrek asteazken honetan Angelun, Anglet Cote Basque taldearen kontra.
Bigarren Mailan puntu gutxien jaso duen taldea izango da Ikasbasket
