Hondarribia-Katsikasek bihar egingo duen zozketari lotuta, mural erraldoia sortuko dute gaur Madalen plazan, arratsaldean haurrek, gauez nagusiek.
Judas Arrieta gidari, mural erraldoia sortuko dute gaur Madalen plazan (marrazkia: J. Arrieta)
Biharko elkartasun zozketari lotuta, Hondarribia-Katsikas Boluntario Taldeak ekintza artistiko ikusgarria antolatu du gaurko eta biharko, Madalen plazan. Judas Arrieta artistak koordinatuta, 2’5×5 metroko mural erraldoia sortuko dute elkarlanean, bihar eraisteko. “Ekintza horrekin, errefuxiatuak gugandik banatzen dituen harresia bota egingo dugu”, azaldu du artista hondarribiarrak.
Murala gaur margotuko dute, bi saiotan. 16:00etatik 20:00etara, haurrek fondoa margotuko dute, eta 21:00etatik aurrera, lau orduz, helduek. Iluntzetik aurrera jarduera are bereziagoa bilakatuko da, DJak musika jartzen ariko direlako, eta proiekzioen laguntzarekin margotuko dutelako: “Haurrek egindakoari mezuak eta irudiak gehituko dizkiogu. Artearen bitartez errefuxiatuen dramaren inguruan hausnartzea da helburua, eta Grezian gertatzen ari dena irudikatzen saiatuko gara”.
Eta larunbatean murala suntsituko dute, 08:00etatik 14:00etara. 800 puskatan zerratuko dute, eta bakoitza euro batean saldu. Hala, ekintzan parte hartzen dutenek formatu handiko artelan bat sortzeko aukera izango dute, eta haien gurasoek, artelan horren zatitxo bat etxera eramatekoa. “Herritarrek parte hartzea eta esperientzia horren zati bat etxera eramatea da helburua, eta, aldi berean, errefuxiatuei laguntzea”, azaldu du Arrietak.
Bihar ere izango da zuzeneko musika, dena ez da zerraren zarata izango. 11:00etatik aurrera, hiru kontzertu burutuko dituzte, kaleko musikarien formatuarekin.
Antolatzaileek esan dutenez, larunbata goizean laguntza beharko dute, “zerratutako puskak lixatu behar dira, saldu aurretik”. Hortaz, margotzeaz gain, bada beste modu bat Madalen plazako ekintza burutzen laguntzeko.
Larunbateko kontzertuak
- 11:00 Urbil Artola (dobroa), Nora Artola (ukelelea), Gorka Arranz (gitarra).
- 12:00 Koldo Emery (gitarra eta ahotsa).
- 13:00 Jon Sanchez Rubio (gitarra eta ahotsa).
