Harresia eraiki, harresia behera botatzeko

Hondarribia-Katsikasen zozketa lotuta, arte ekintza erraldoia egingo dute hilaren 21ean eta 22an, auzolanean. Haurrek parte hartzea nahi dute.

Asier Perez-Karkamo

Hondarribia

2017/04/06

Judas Arrietak gidatuko du ekintza. Arratsaldean haurrekin ariko da, afalostean nagusiekin

San Pedro kalean egingo du Hondarribia-Katsikasek zozketa hilaren 22an, goizez. Handik oso gertu, Santiago kalean egiteko, arteari lotutako ekintza ikusgarri bat antolatzen ari dira, bezperatik egiteko. Judas Arrietak gidatuta, zurezko mural erraldoia margotuko dute auzolanean, errotulagailuak, margoak, proiekzioak eta abar erabiliz: “Arratsaldeko lauretatik zortzietara haurrek, eta 22:00etatik aurrera nagusiek. Haurrekin fondoak egingo ditugu, eta nagusiekin mezuak eta irudiak. Artearen bitartez errefuxiatuen dramaren inguruan hausnartzea da helburua, Grezian gertatzen ari dena irudikatzen saiatuko gara”. Eta larunbatean murala suntsituko dute, “errefuxiatuak gugandik banatzen dituen harresia botako dugu”. 800 puskatan zerratuko dute eta bakoitza euro batean saldu. Hala, ekintzan parte hartzen dutenek, formatu handiko artelan bat sortzeko aukera izango dute, eta haien gurasoek, artelan horren zatitxo bat etxera eramatekoa. “Herritarrek parte hartzea, eta esperientzia horren zati bat etxera eramatea da helburua, eta, aldi berean, errefuxiatuei laguntzea”, azaldu du Arrietak. Musika eta artea, eskutik Artea izango da hilaren 21ean eta 22an Santiago kalean kultur adierazpide nagusia, baina ez bakarra. Zuzeneko musika presente izango da, bai ostiral gauean, baita larunbat goizean ere. “Ostiralean DJak izango ditugu, eta iluntzen duenean proiekzioekin margotzen hasiko gara. Oso giro berezia sortuko du horrek”. Eta larunbaterako, formatu txikiko kontzertuak iragarri dituzte, herriko abeslari eta musikariekin. Ez dute zerrendarik aurreratu, baina ekitaldiari “kaleko musikarien itxura” eman nahi diotela aurreratu du Hondarribia-Katsikasek.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.