Katea artez jantziko da
Auzoko lursail bat egokituko dute datozen egunetan, Auzo Sortzailea proiektuaren barruan.
Katea auzoa kolorez beteko dute datozen egunetan. Martxoaren 4ean eta 11an ekintza artistiko bat egingo dute, eta arte garaikidearen bidez, auzoko lursail bat egokituko dute.
Auzo Sortzailea programaren barruan egingo dute, eta horren bidez, artistak eta auzo elkarteak harremanetan jarri nahi dituzte, auzoa dinamizatzeko xedearekin. Kasu honetan, Kunsthal Arte Plastiko eta Diseinu Eskola eta Katea-Landetxa auzo elkartea jarri dituzte harremanetan.
Zehazki, egokituko duten eremua Elizatxo, Aranibar eta Andrearriga kaleek osatzen duten hirukian dagoela jakinarazi du udalak. Bertan, lurra mugituko dute, palet batzuk eta antzeko elementuak jarri eta ingurua dekoratu. Azken finean, helburua, arte mailako hobekuntza bat egitea dela gaineratu du udalak.
Honetara heltzeko, Kateako auzotarrek parte hartze prozesu bat egin dutela esan du udalak.
Proiektu hori FEDER Europako diru laguntzen bidez finantzatuko da, eta Ibilbide Bereziak proiektuaren barruan dago.
Katea auzoan egin dituzte antzeko ekimenak, Auzoa Koloreztatuz, esaterako.
