Ganix Mironen neskek erraz menderatu dute Oncineda taldea eta lau garaipeneko tartea ireki dute seigarren sailkatuarekiko.
Bigarren Mailari neurria hartu dio Hondarribia Ikasbasket saskibaloi taldeak
Express Hondarribia Ikasbasket taldeak ligako hamabigarren garaipena lortu zuen larunbatean Hondartza kiroldegian. 75-49 irabazi zioten Lizarrako Proyecta It Oncineda taldearen kontra. Ganix Mironek entrenatzen duen taldeak beste urrats bat eman du liga erregularraren amaieran Euskadiko Lehen Mailarako igoera fasea jokatu ahal izateko. Une honetan hirugarren dago Ikasbasket, lidergoa partekatzen duten Burdinola Getxo eta Campus Promete taldeengandik garaipen batera —Prometek partida bat gutxiago du—, eta igoera fasetik kanpora dagoen lehen taldearekiko lau garaipeneko tartea duela (
sailkapena).
Larunbateko partida lehen unetik erabakitzera atera zen Ikasbasket, erritmo handiz. Defentsako lan itogarrian oinarrituta, 8-0ko partziala lortu zuten hondarribiarrek. Hortik aurrera, partida kontrolpean izan zuten uneoro; lehen laurdena 24-9ko emaitzarekin bukatu zen eta atsedenaldira 17 puntuko aldearekin joan ziren Ganix Mironen neskak (42-25).
Bigarren zatian, aldeari eutsi zion Ikasbasketek, eta zerbait handitzea ere lortu zuen. Erasoan ez zuten hainbeste asmatu baina defentsako lanean serio jardun zuten. Azken minutuetan, gutxiago aritzen diren jokalariei aukera eman zien berdeen entrenatzaileak. Liga luzea da, eta partida erabakigarrietan denen onena beharko du Hondarribiko taldeak.
Leire Oregi bikain aritu zen saski azpian, 11 errebote jasoz eta 17 puntu saskiratuz. Cristina Gonzalezek 13 egin zituen eta Nerea Saenz de Buruagak 12.
Hurrengoa, Iruñean
Datorren asteburuan aurkari zuzen baten kontra jokatuko du Hondarribia Ikasbasket taldeak Iruñean, Sensitest Navarro Villosladaren kontra. Multzoko talde indartsuenetako bat da iruindarra, baina azken hiru partidetatik bi galdu dituzte, eta sailkapenean behera egin dute, bigarren postutik laugarrenera. Hondarribiarrek larunbatean garaipena lortuko balute, hanka eta erdi izango lukete igoera fasean.
