Zoru klausulen kontrako epaia azalduko du Jose Mari Erauskinek
Abotsanitzek Kaleratzeak Stop elkarteko abokatuaren hitzaldia antolatu du datorren asteazkenerako. Kultur Etxeko areto nagusian izango da.
Jose Mari Erauskin abokatuak, hipoteka kontratuen klausulei buruzko hitzaldia emango du heldu den asteazkenean Hondarribiko Kultur Etxeko areto nagusian. Abotsanitzek antolatu du, eta “abusuzko” klausulen aurrean herritarrek informazio praktikoa jasotzea bilatzen du. “Klausula hauen ondorioz, milaka pertsonek eragin latzak jasan dituzte. Askok beharrezkoa baino kopuru handiagoak ordaindu behar izan dizkiete kutxa zein banketxeei, beste askok beraien eta senitartekoen etxebizitzak galdu dituzte, eta azkenik, egoera okerrenak bizi izan dituztenek, etxebizitzak galtzeaz gain, bizi osorako zorrak izango dituzte banketxeei itzultzeko”.
Etxegabetzeen kontra jarduten duen Kaleratzeak Stop elkarteko abokatua da Erauskin, eta eskarmentu handia du etxerik gabe geratzeko arriskuan daudenei laguntzen. “Bide guztiak jorratu dituzte kalte hauek ekidin nahian —nabarmendu du Abotsanitzek—. Herri, probintzi, elkarte autonomo, estatua eta Europar Batasuneraino ere jo behar izan dute egoera hauek salatzeko”.
Hain justu, Europako Justizia Epaitegi Gorenak Espainiako Estatuan banketxeek aplikatu dituzten hainbat klausulen kontrako epaia eman du, eta erabaki horrek izango dituen ondorioak azalduko ditu abokatu hondarribiarrak Kultur Etxean: “Europar Batasuneko epaileek bidegabetzat jo dituzte banketxeek hipoteka kontratuetan jasotako hainbat klausula. Handik ere igorri dute agindua klausula horiek eragindako kalteak banketxeek bere osotasunean kaltetuei itzuli behar dizkietela; hala nola, zoru klausulak, hipoteka kostuak, eta abar”.
Hitzaldia, bilera didaktikoa izatea nahi dutela adierazi dute antolatzaileek: “Interesgarria da gerturatzen direnek, nahi izanez gero, beraien kontratu hipoteka kontratuak ekartzea, kasuak modu praktikoan jorratu ahal izateko”. Gainera, erreklamatzeko zer egin behar den azalduko dutela gaineratu du Abotsanitzek.
Asteazkenean izango da Erauskinen hitzaldia, 19:00etatik aurrera, Kultur Etxeko areto nagusian.
Jose Mari Erauskin (arg: Abotsanitz)
