Porcelanas Bidasoan bizitakoa kontatuko dute
Ostegun honetan hitzaldi bat emango dute bertan lan egin zuten hainbat lagunek.
Porcelanas Bidasoaren erakusketaren testuinguruan, ostegun honetan, hilak 13, hitzaldi bat emango dute bertan lan egin zuten bost lagunek. Bertan, enpresa entzutetsuan izandako esperientzia eta bizipenak kontatuko dituzte. 19:00etan hasiko da.
Parte hartuko duten langile ohiak Carlos San Martin diseinu arduraduna, Jesus Muñoz biltegi eta paketatze arduraduna, Jose Miguel Cuesta mantenu arduraduna, Manuel Guzman erosketa arduraduna eta Rafael Burgos modelista izango dira.
Kontakizun horien bidez, enpresan nola lan egiten zuten jakin ahal izango da: ereduaren diseinua, piezak egiteko beharrezko artikuluak, pieza bat nola egiten zen, nola paketatzen zen… 2009an itxi zuten Porcelanas Bidasoa.
Museoa denen artean
Behin-behineko erakusketarako piezak entregatzeko asmoa dutenek oraindik aukera daukate hori egiteko, museoan bertan. Dagoeneko hainbat dira jasotako piezak, Oiasso museoaren arabera. Erakusketako bitrina batean jarriko dituzte, eta hori amaitzean, jasotzeko aukera izango dute.
Bestalde, bisita gidatuak egiten jarraitzen dutela gogorarazi dute, larunbatero, 12:00etan. Horietan parte hartzeko tokia hartu beharko da 943 63 93 53 telefono zenbakian edota webgunean.
Porcelanas Bidasoaren lantegia (Argazkia: http://bidasoatikbidasoan.blogspot.com.es)
Erlazionatutako edukiaPorcelanas Bidasoa, erakusketa batean
