Liderra baino gehiago izan da Hondarribia Ikasbasket
Campus Prometeren etxean irabazi duen lehen taldea da Ikasbasket. Hirugarren jarri da sailkapenean.
Inork aurretik egin gabekoa lortu zuen Express Hondarribia Ikasbasket taldeak larunbatean, Campus Promete liderraren etxean irabazi zuen (59-61). Denboraldian Logroñoko Adarragan irabazi duen lehen bisitaria izateaz gain, Bigarren Euskal Ligako aurreneko bosten artean sailkatzeko urrats izugarria eman zuen Hondarribiko taldeak. Lehen sailkatuak baino garaipen bat gutxiago du orain Ikasbasketek, eta seigarrenarekiko hiru garaipeneko tartea ireki du.
Lehen zatia oso parekatua hasi zen. Errebotean gehiago ziren errioxarrak, eta bidasoarrak defentsan eta kanpoko jaurtiketetan. Lehen partziala Ikasbasketen aldekoa izan zen (12-16).
Bigarren laurdenean, alderantziz, Campus Promete hiruko marratik asmatzen hasi zen, eta zelai osoan presionatzen hasi ziren. Baina Ikasbasketek maisuki gainditu zuen etxekoen presio hori eta atsedenaldira lau puntu aurretik joan ziren Mironen neskak (27-31)
Aldalekutik bueltan bi taldeek oso argi zuten partida irabazteko defentsa gogortu behar zela. Horren adierazle, hirugarren laurdeneko partziala: 6-8, berriro hondarribiarren alde. Azken hamar minututan errazago saskiratu zuten bi taldeek. Ikasbasketek minutu oso onak izan zituen eta 11raino handitu zuen aldea, sei minuturen faltan. Orduan erakutsi zutek errioxarrek zergatik dauden lidergoan. Defentsa estutu zuten, baloiak lapurtzen hasi ziren eta kanpotik puntuak sartzen hasi ziren, markagailua iraultzeraino. Bi minutu falta zirela bi aurretik jarri zen Campus Promete. Kiroldegia alde, partida etxean geratuko zela zirudien.
Baina Hondarribiko taldea ez zen kokildu. Tiro libreen marratik asmatu zuten, Jennifer Zelaietak hirukoitza sartu zuen eta Leire Izagirrek jarri zion ginga pastelari, jokaldi paregabe batekin. Izagirre eta Zelaieta izan ziren hain zuzen ere berdeen saskiratzaile onenak, 18 eta 16 punturekin hurrenez hurren.
Hurrengoa, etxean
Datorren asteburuan aukera polita izango dute hondarribiarrek Bigarren Mailako goialdean egonkortzeko. Etxean jokatuko du, mailari eusteko borrokan buru belarri dagoen Proyecta It Oncineda Lizarrako taldearen kontra.
Orain arte lau partida irabazi eta hamar galdu ditu Oncinedak eta lehen itzulian bederatzi puntuko aldeagatik galdu zuten Ikasbasketen kontra.
Defentsako lana da Express Hondarribia Ikasbasket taldearen armarik onena
Hondarribiko asteburuko kirol emaitzak
