Gizarte klausulen ekarpenak aurkeztu ditu EH Bilduk
Udalaren zirriborroan EH Bildurentzat oinarrizkoak diren hainbat alderdi ez zeudela adierazi du.
EH Bilduk gizarte klausulen dokumenturako bere ekarpenak aurkeztu ditu. Horrekin batera, horien garrantzia nabarmendu du, “sistema publikoaren orekarako” baliagarriak direla iritzita. Udalaren zirriborroan udal taldearentzat oinarrizkoak diren hainbat alderdi ez zeudela adierazi du; hala nola, justizia fiskala, bidezko merkataritza eta hizkuntza eskubideen babesa. Horiek kontuan hartzeko eskatu du, beste zenbait ekarpen egitearekin batera.
Hala, udal langileen lan baldintzak bermatuko dituen klausula gaineratzeko eskatu du, “herrialdeko lan hitzarmena betetzea exijituz”. Bestetik, lan hitzarmenak errespetatzea, ingurumen irizpideak ziurtatzea eta euskararen presentzia nahiz genero ikuspegia bermatzea eskatu du. Azkenik, ezgaitasunen bat duten pertsonen presentzia ere beharrezkotzat jo du.
Horrez gain, gizarte klausula horiek kontratu guztietan aplikatzeko derrigortasuna txertatu du, eta kontratatzeko debekuak ere bildu ditu bere ekarpenean.
Gizarte klausulek langileen oinarrizko baldintzak eta kalitatezko enplegua bultzatzeaz gain, bertako enpresei ere onura eragin diezaiekeela iritzi dio EH Bilduk.
Jokin Melida EH Bilduko bozeramailea.
