Fleuryko euskal presoek protestaldia abiatu dute
Tomas Elgorriaga hondarribiarra eta beste bost euskal preso borrokan daude hilaren 1etik.
Fleury-Merogis espetxean dauden euskal presoek, horien artean Tomas Elgorriaga hondarribiarrak, borrokaldia abiatu dute. Espetxe-zaindari batek urtarrilaren 19an Iñaki Reta Elorrioko presoari emandako jipoiagatik abiatu dute protestaldia, eta zaindari hori lekuz aldatzeko eskatzen dute; espetxeko zuzendariari idatziz helarazi zizkioten haien eskakizunak.
Etxerat erakundeak jakinarazi duenez, aurretik zaindari horren jarrera salatua zuten presoek: “Funtzionarioaren jarrera ezagututa, euskal presoekiko mantentzen duen jarrera ezkorra eta hainbat kideek jasandako erasoak direla medio, bere funtzioetan ez aitortzea erabaki zuten Fleuryko euskal preso politikoek”.
Hilaren 1ean hasi zuten borroka. Ordutik, asteartetik ostiralera uko egiten diote espetxeko bazkariari, eta astelehenetik ostegunera salaketa kartelak jartzen dituzte patioan. “Urtarrilaren 19an gertatutakoa baino larriagoa da espetxeko arduradunen jarrera, eta neurriak ez baldin badira hartzen, euskal presoen esanetan, gehiegikeria eta tratu txarrak errazten dituen inpunitate eremua sortzeko arriskua dago”, erantsi du Etxeratek.
Euskal presoen aldeko Hondarribiko taldearen arabera, gertatutakoak “euskal presoak noren eskuetan dauden erakusten du”, eta gutun bidalketa masiboa abiatu dute Elgorriagari eta gainontzeko presoei sostengua adierazteko. Hain zuzen ere, Fleuryko zuzendariari eta 1. dibisioaren arduradunari hasi zaizkie gutunak igortzen.
