Bi hozkailu erosteko 7.000 euroren bila
Bidasoaldeko Bidazi elkarteak erronka bota du. Produktu freskoak eskaintzeko hozkailuak behar dituzte dendan, eta horretarako diru bilketa kanpaina bat martxan jarri dute Interneten.
Erronka botata dago: bi hozkailu erosteko 7.000 euro biltzea. Bi ez badira, bat, gutxienez, bai. Horretarako 3.500 euro behar dituzte. Bidazi Bidasoa eskualdeko elkartea dago horren atzean. Azokan eskaintzen dituzten produktu freskoak gordetzeko behar dituzte hozkailuak, eta 40 egunetan, martxoaren 5a baino lehen, bildu nahi dute dirua.
Azoka da Bidaziren erdigunea. Hasier Irazoki elkarteko kideak azaldu duenez, azoka deitzen diote, baina, berez, denda bat da, Alkaiaga industria gunean, Lesakan (nahiz eta Beratik gertuago egon), kokatuta dagoena. Bertan, produktu ekologikoak saltzen dituzte inguruko ekoizle txikiei erositakoak gehienbat.
«Hozkailu bat izateak beste gisako produktu batzuk edukitzea ahalbidetuko digu», azaldu du Irazokik. Horren bidez, batetik, kontsumitzaile eta bazkideek orain arte dendan aurkitzen ez zituzten produktuak erosteko aukera izango dute, eta, bestetik, ekoizle txikiek euren produktuei aterabide bat emateko. Jaki fresko horien artean aurkitzen dira, hala nola, gazta, esne freskoa, haragia edota jogurtak.
Irazokiren arabera, duela hiru urte proiektua martxan jarri zutenean, aukera bazeukaten halako produktuak eskaintzeko, Iruñeko Landare kontsumo elkarteak hozkailu bat utzi baitzien. «Zaharra zen, eta azkenean, hondatu egin zen. Hasieran, ahalegina egin zen arren, gero, ez zegoen aurrekonturik berria erosteko», gaineratu du Bidaziko kideak. Edonola ere, beti buruan izan dute atal hori, eta horregatik erabaki dute, orain, crowfounding edo diru bilketa kanpaina martxan jartzea.
Mural itxurako hozkailua da behar dutena, dendetan egoten diren horietakoa. Gutxienekoa hozkailu batean finkatu dute, baina «optimoa» bi liratekeela zehaztu du Irazokik: «Adibidez, baratzeko produktuek beroarekin sufritzen dute, eta hozkailua ere baliatuko genuke. Gainera, ekoizlea txikia denean, dendara etortzeko aukera astean behin baino ez dauka. Beraz, hobekiago mantenduko lirateke bere produktuak hozkailua edukiz gero». Gainera, Bidaziren asmoa hazten jarraitzea da, eta hozkailuaren eskutik produktu aukera zabalduz hasi nahi dute.
Ekarpenak Internet bidez egin behar dira, webgune honetan. Irazokiren esanetan, irabazi asmorik gabeko webgunea da, eta beraiek bezala, beste diru bilketa kanpainak egiteko baliatu izan dute beste entitate batzuk. Lehen ekarpenak hasi dira jasotzen, eta dagoeneko 900 euro bildu dituzte.
Haziz doan elkartea
Hiru urtean 150 bazkide lortu ditu Bidazik. Ekologikoan eta bertan ekoiztutakoaren eta iraunkortasunaren inguruko balioak defendatzen zituen pertsona batzuk jarri zuten martxan, eta urtez urte hazi egin da. Produktu ekologikoak merkaturatzea du oinarri, eta azokan honakoak aurki daitezke: elikagaien barruan, barazki eta frutak, esnekiak, haragia, pasta, arroza, algak, zerealak, irinak, azukrea, gatza, gailetak, kondimentuak…. Horrez gain, higienerako eta garbiketarako produktuak ere badituzte, baita etxea garbitzeko produktuak ere. Azoka ez da, ordea, ekintza lerro bakarra, eta formazioa ere eskaintzen du.
Azken urteetan jaten duenaren inguruan jendea kontzienteago dela iruditzen zaio Irazokiri, eta horren isla dela, hain zuzen, Bidazi: «Bertakoa, kalitatezkoa eta osasuntsua izateko gogoa pizten ari da».
Bidaziren diru bilketa kanpainari buruz Isabel Mancebo Baldak egindako ilustrazioa.
