1987an egin zituzten aro zaharreko lehen herri olinpiadak. Harresilandako gaztetxeak antolatu zuen lehen ekitaldia.
Parte hartze handieneko urtean 46 taldek eman zuten izena
Laugarrenez egingo dituzte aurten garai berriko olinpiadak Hondarribian. 2014an hasi ziren, 1980 eta 1990ko hamarkadetan egiten zirenetan oinarrituta. 1987an egin zuten lehenengo ekitaldia eta, orotara, zortzi ekitaldi izan ziren.
Gaztetxetik sortu ziren olinpiadak. 1985ean gazteek etxe bat okupatu zuten Harresilandan eta gaztetxe bilakatu. Hitzaldiak, kontzertuak, tailerrak eta abar antolatzen zituzten bertan, eta gaztetxeko kide batek garai hartan Andoainen eta Hernanin egiten ziren koadrilen arteko jokoak Hondarribian egiten hastea proposatu zuen; neguan herria hilda zegoelako kexu ziren gazteak.
Sare sozialik gabe, pankartez eta errotulagailuz idatzitako kartelez josi zuten herria, asanbleara deituz. Erantzuna itzela izan zen. Hemezortzi taldek eta 300 gaztek parte hartu zuten Hondarribiko herri olinpiadetako lehen ekitaldian. Urte hartan askotariko probak antolatu zituzten: mus txapelketa, xakea, bertso proba, kirolak eta beste jokoren bat. Hilabete eta erdi iraun zuen eta herriko giroa guztiz iraultzea lortu zuten. Gaztetxetik abiatu zen ideia, baina herrira zabaltzea lortu zuten lehen urterako, eta errepikatzea erabaki zuten.
Hurrengo urtetan asko handitu ziren olinpiadak, eta gazteak ez ziren pertsonak ere animatu ziren. Ekitaldietako batean 46 taldek eman zuten izena. Urte hartako inauterietako ostiralean 2.500 pertsona bildu ziren lau orduz luzatu zen parodia olinpikoan.
Seigarren ekitalditik aurrera beherakada iritsi zitzaien olinpiadei. Antolakuntza jarduten zuen batzordeak erreleboa eskatu zuen, baina ez zen behar bezalako erantzuna izan eta, bizpahiru urte gehiagoz egin bazituzten arren, indarra galdu zuten olinpiadek, desagertzeraino.