Milioiek poza eragin dute Irunen
Pozarren dira Txingudiko merkataritza zentroko 7. administrazioan Euromilioi zozketako 25, 8 milioi euroko saria emateagatik.
“Niri tokatu balitz bezala sentitzen naiz”, esan du, pozarren, Cristina Calvo Txingudi merkataritza zentroan dagoen 7. administrazioko langileak. Poza eragin du, oro har, Irunen Euromilioiak zozketako sari potolo bat bertan banatu izanak, baina hirian bertan ala batek daki nork, ziur, atzoko zozketan irabazle izan den txartela duena oraindik eta poz handiagoarekin dagoela: 25,8 milioi euro tokatu zaizkio.
Atzo gauaz geroztik, Calvoren telefonoa sutan dago, whatsapp mezuak eta deiak etengabe jasotzen ari delako, zoriontzen. “Horrelako zerbait gertatzea izugarria da, ez delako batere ohikoa. Administrazioarentzat bezeroak erakartzeko interesgarria da”. Ez da gutxiago ere, Gipuzkoan ez du inoiz ere txartel bakar batek horrelako sari handirik irabazi. Aurretik banatutako handiena, 2014an izan zen Trintxerpen, 12 milioi euro, Paloma Ortiz de Zarate Espainiako Loterien EAEko ordezkariak azaldu duenez.
Goizean zehar ere, begiluzeak hurbildu dira dendara, zer gertatu den galdetzera. Txanpain botila ireki dutenean eta kartelak atera dituztenean, ez zegoen zalantzarik: zerbait potoloa gertatzen ari zen.
Orain, denek buruan duten galdera da: nori tokatu ote zaio? “Ez dugu inoiz jakingo”, adierazi du Calvok. Edonola ere, susmo batzuk badituzte, eta ohiko bezero bat dutela uste dute, zenbakiak berak aukeratu dituelako, eta tarteka etortzen direnek, normalean, makinan egiten dutelako. Hori bai: “Bi apustu egin ditu, eta 5 euroren truke 25 milioi tokatu zaizkio”, zehaztu du.
Administrazio berak aurretik banatutako sari potoloena 2003an izan zen: 3 milioi euro, Primitivan.
Denak ez dira albiste onak, ordea, Calvorentzat. Loteria administrazioan aldaketak izan dira, eta hamasei urteren ondoren, larunbatean azken lan eguna izango du: “Hala ere, hiru egun aurretik saria eman izana erabat pozgarria da guretzat”.
Ederki ospatu dute Txingudi merkataritza zentroko 2. administrazioan Euromilioiak zozketako 25,8 euro banatu izana.
Erlazionatutako edukiaEuromilioiak zozketak sari potoloa utzi du Irunen
