Euskarazko antzerki ausarta eta gertu-gertukoa

Distopia Antzerki Galdara konpainia oiartzuarrak Gaur ez da inoiz ekarriko du larunbatean Hondarribira. Sare sozialek bahituta duten gazte bat da protagonista.

Asier Perez-Karkamo

Hondarribia

2017/01/10

Xabi Lopez, ‘Gaur ez da inoiz’ obrako entsegu batean

Handia izan gabe, konpainia handiak pasatu dira Hondarribiko Itsas Etxetik. Baina horrek ez du esan nahi horientzat bakarrik denik edota, gutxiago, horien bitartez bakarrik iristen denik antzerki ona bertara. Larunbatean, esaterako, proposamen ausarta iritsiko da Itsas Etxera, gertukoa gaiari dagokionez, baita distantziari begiratuta ere. Gaur ez da inoiz da obraren izenburua, eta Xabi Lopez zuzendari oiartzuarraren Distopia Antzerki Galdara konpainiaren lehen lana da. Zuzendari izateaz gain, gidoia ere Lopezena da eta aktore bezala ere aritzen da, Samuel Quel, Garazi San Martin eta Irantzu Sanchezekin batera. Gaur ez da inoiz Iruñeko Antzerki Eskolan (ENT) estreinatu zuten iazko udaberrian, egonaldi artistiko baten ondoren. Taldeak egonaldia egin zuen eskola iruindarrean, obra burutzeko. Proiektua euskaraz jaio zenez, estreinaldia ere euskaraz egin zuten. ENTren zuzendari Javier Perezek nabarmendu zuenez, lehen aldia izan zen antzerki obra bat Iruñean euskaraz bakarrik antzezten zela. Itsas Etxera ekarriko duten obra tragedia bat da, baina ez zaio umorea falta, eta gaia kontuan izanik, bat baino gehiagok ikusiko du bere burua eszenatoki gainean. Izan ere, Internetak eta sare sozialek harrapatuta duten gazte bat da protagonista. Kritika soziala egitea da laukotearen helburu eta, hitzen, dantzaren eta interpretazioaren bitartez, ikuslea bideratuko dute errealitatearen inguruko hausnarketa egitera. Antzezlan ausarta da Gaur ez da inoiz, ausarta den bezala Distopia Antzerki Galdara taldea, tentuz jarraitu beharrekoa. Larunbatean taularatuko dute Gaur ez da inoiz Hondarribiko Itsas Etxean, 20:00etan, eta sarrerak dagoeneko eros daitezke Arma Plaza kultur gunean (ostirala arte), 4 euroan, edo Interneten.

Hitzak bi sarrera zozkatuko ditu harpidedunen artean

Gizarte hotz baten kritika soziala egiten du Distopia konpainiak

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.