Hotzari aurre egiteko, opila
Errege opilaren 2.000 errazio banatu dituzte, gaur, Zabaltza plazan. Ilara luzea sortu da, baina denbora gutxi egon behar izan dute opila probatu nahi zutenek.
Eguerdiko hamabiak. 3 gradu markatzen ditu Zabaltza plazako termometroak. Hotza egiten du. Hala ere, jende ugari bildu da plazan. Erregetako lehen oparia nahi dute, opila.
Ilara luzea sortu da opila probatu nahi dutenekin. Hala ere, azkar doa, erritmo onean. 10 minutu inguru egin du koadrila batek ilaran, eta dagoeneko opila jaten ari dira. “Gozoa dago, baina gehiago jateko gogoarekin geratzen zara”, esan du batek. Opila probatzen ari denak, behintzat, bat datoz zerbaitetan: gozoa dagoela.
Pozik dira jaso duten harrerarekin egileak, Hernaniko Fernando gozotegikoak. Eurek egindako lanak fruitua jaso du, eta ez bakarrik errege opilaren gainean dagoena. Fernando Diez arduradunak azaldu duenez, atzo hasi ziren prestatzen, 11:00ak aldera. Orea egin, fermentatu eta labean sartu. Kontu handia eduki behar izan dutela aipatu du, gaur Irunen aurkeztu duten opila ez delako ohikoa bezalakoa, handiagoa baizik. Gero, esnegainez bete, eta, behin osatuta, bildu eta kamioian sartu, hotzaren katea hautsi gabe. Guztira, 250 kilo erabili dituzte, eta, gutxi gorabehera, 450 kiloko opiltzarra egin dute.
Opil erraldoia hainbat opil txikirekin osatuta zegoen, bakoitza 55×35 zentimetrokoa. Lehen aldia izan da horrelako zerbait egiten dutela, baina oso ondo atera dela iritzi dio Diezek.
2.000 errazio inguru kalkulatu dituzte, eta ilara handia bazen ere, denei iritsiko zaiela uste du gozogileak: “Seinale ona izango zen denek jateko aukera izatea”.
Errege opilaren 2.000 errazio banatu dituzte Zabaltza plazan.
