Kopako partida solidarioa
Aspanogi Gipuzkoako Haur Minbizidunen Guraso Elkartearekin elkarlanean, zapi batzuk jarriko dituzte salgai, eta bildutako dirua elkartearentzat izango da.
Gaur, 20:15etik aurrera, Puente Genil jasoko du Artalekun Bidasoak. Espainiako Kopako joaneko partida izango da, eta, gainera, solidarioa. Izan ere, Aspanogi Gipuzkoako Haur Minbizidunen Guraso Elkartearekin elkarlanean, zapi batzuk jarriko dituzte salgai, eta bildutako dirua elkartearentzat izango da.
Hain zuzen, bildutako diruarekin jostailu bat, drone bat, erosi nahi dute, haurrek ospitalean egin beharreko egonaldia samurragoa izateko.
Zapiak 2 euro balioko ditu, eta Artalekuko sarreran lortu ahal izango da.
Ligako partida ahazteko
Joan den asteburuan jokatu zuen azkenekoz Bidasoak Artalekun, eta partidaren emaitza ez zen esperotakoa izan, galdu egin baitzuen Morrazo, azken aurreko sailkatuaren kontra. Arantza hori kentzeko asmoz, kopako final hamaseigarreneko partida izango du Puente Genilen kontra. Biak antzeko egoeran daude ligan, eta denboraldian jokatutako partida bakarra ere berdindu egin zuten.
Puente Genil kanporatuz gero, beste maila bat gehiago gainditu beharko du Bidasoak zortziko finalean sartzeko.
Aspanogi elkartearentzat izango da kopako partidaren harira, salgai jarritako zapiekin bildutako dirua.
