Lehen Oparideiak Merkatua, errepikatzeko modukoa
Larunbat eta igandez egin zuten Itsas Etxean eta balantze positiboa egin du udalak eta merkatariak ere pozik zeuden bisitari kopuruarekin.
Jendetsua izan da Hondarribiko Gabonetako Oparideiak Merkatua. Larunbat eta igandez egin zuten Itsas Etxean eta balantze positiboa egin du udalak eta merkatariak ere pozik zeuden bisitari kopuruarekin.
Gabonetako kanpainan parte hartzen duten hemeretzi saltokietatik hamabik jarri zuten postua azokan. Agian, hori izan daiteke alde ez hain positibo bakarretakoa, eskaintza ez zela oso zabala, baina ulertzekoa da dendari guztiek ez ikustea euren burua merkatu batean saltzen, are gehiago lehen ekitaldia izanik. Hori bai, aurtengo arrakasta ikusita, normalena litzateke hurrengo urtean gehiago izatea.
Larunbat goizean ateak ireki zituenetik jendetza hurbildu zen Itsas Etxera. Maria Serrano Merkataritza eta Turismo zinegotziak nabarmendu du merkatuak uneoro izan dituela bisitariak: “Jende asko ibili da bertan, eta parte hartze handia izan da. Oso asteburu bizia izan da, merkatarien standak, eskulan tailerrak, kontzertuak zuzenean, etab. izan dira”.
Merkatariak ere pozik
Hortaz, balantze positiboa egin du udalak, eta merkatariak ere pozik daudela gaineratu du zinegotziak: “Udaletik egiten dugun lehenengo balantzea oso positiboa da, merkatuan merkatariek pozik zeudela adierazi ziguten. Izango da balorazio xeheagoa egiteko denbora, baina lehenengoak oso positiboa izan behar du”.
Lehen aldiz antolatu dute udalak eta merkatariek Oparideiak Merkatua, tokiko merkataritza sustatzeko Gabonetako kanpainaren barruan. Serranok eskerrak eman dizkie udalarekin elkarlanean kanpaina diseinatu duten saltzaileei: “Lan-giro ona dago, eta horrek emaitzetan ondorioa izango du. Horretan gabiltzan guztiok gauza bera nahi dugu, Hondarribiko merkataritza balioan jarri eta ezagutarazi”.
Udalak eta merkatariek balantze positiboa egin dute
Erlazionatutako edukiaOparideiak itzuli dira, berrikuntzekin
