"Uste osoan gaude ez zuela inoiz gertatu behar"
Giza Eskubideen Egunean, Hondarribiko alderdi guztiek Josu Zabala irundarra izan dute gogoan. 1976ko irailean Guardia Zibilak erail zuen San Pedro kalean.
Giza Eskubideen Nazioarteko Egunean, Hondarribiko Udalak Josu Zabala zena izan du gogoan. Udalean ordezkaritza duten alderdi guztiek (EAJ, Abotsanitz, EH Bildu, PSE-EE eta PP) 1976ko irailaren 8an Guardia Zibilak tiroz hil zuen gaztearen aldeko oharra adostu dute. 40 urte bete dira aurten Alarde Egunean hil zutela Zabala, eta udalaren iritziz, “uste osoan gaude ez zuela inoiz gertatu behar”.
Oharrean, “herri honetan izandako giza eskubide guztien urraketen azterketa kritikoa” egiten dute alderdiek, eta herritarrei gauza bera egiteko eskatzen diete: “memoria kolektiboa osatzeko herritar guztion arteko elkarlana ezinbestekoa dela uste dugu. Gertatutakoaren egia, aitortza, erreparazioa eta berriz gerta ez dadin baldintzak eraiki behar direla uste dugu”.
Giza Eskubideen Egunean bizikidetzaren aldeko konpromisoa hartu dute Hondarribiko alderdiek. “Iragana ezin da etorkizuneko bizikidetzarako oztopo izan”, gaineratu dute.
Zabala hil zutenean soinean zuen arropa, Zabala Gogoan lan taldearen erakusketan
