Asteazkenean bilera egingo dute Mendelun. Udalak adierazpen instituzionala onartu du.
Vueling konpainiako hegazkin bat, Hondarribiko pistan lurra hartzen
Hondarribiko Udalean ordezkaritza duten alderdi guztiek aireportuari buruzko adierazpen instituzionala onartu dute. Bertan, pista luzatzearen kontra azaltzen dira, eta gaian ardura duten erakundeei “hiriaren garapena, ingurumenaren errespetua eta segurtasuna” kontuan izateko eskatu diete.
Adierazpenean,
azken albisteek herrian sortutako ezinegona azaltzen dute alderdiek, baina argi uzten dute ez daudela pista luzatzearen alde, “horrelako erabaki batek bete-betean eragingo bailuke, besteak beste, Mendelu auzoaren garapenean, bertako bizilagunei dagokienez, baita jarduera ekonomikoei dagokienez, eta erabat deuseztatuko bailituzke hiriko planeamenduan jasotako determinazioak”.
Horregatik, Sustapen Ministerioari hondarribiarren interesak kontuan hartzeko eskatzen diote, “euskal administrazioekin batera irtenbide tekniko egokiena aztertzen duenean, ez alde batera uzteko Hondarribiaren planeamendua eta garapena, ingurumenaren errespetua eta herritarren nahiz bidaiarien segurtasuna, eta azterketaren emaitza Europako erakundeen oniritzia behar badu eman beharreko pausoak eman ditzala”.
Gainera, aireportuaz eztabaidatzen den bileretan parte hartzeko nahia adierazi du udalak, “eta beste administrazioei eskatuko die Hondarribiaren ahotsa entzuteko jarrera”. Zentzu horretan, Sustapen Ministerioari eta AENAri eskertza luzatzen diote, “azaroaren 3an Aireportuen Koordinazio-Komitearen bilerara gonbidatzeagatik”.
Bihar, bilera Mendelun
Bihar, asteazkenez, bilera irekin egingo dute Mendeluko auzokideen egoitzan, 19:30etik aurrera. Udalak deitu du eta asmoa da herritarrei azken gertakariez informatzea, eta haien iritzia galdetzea. Gobernuko nahiz oposizioko ordezkariak joango dira bilera horretara.
