TAS-ek manifestaziora deitu du bihar indarkeria matxistaren kontra
Txingudi Anti Sexistak egin du deialdia, azaroaren 25aren harira.
Bihar, azaroak 25, indarkeria matxistaren kontrako eguna izango da, eta TAS Txingudi Anti Sexistak manifestazioa antolatu du aurten ere emakumeen kontrako indarkeria errotik ezabatzeko asmoz. Martxa, ohi bezala, Zabaltza plazan hasiko da; handik, San Juan plazan geratuko dira, eta berriro Zabaltza plazarako bidea egingo dute han bertan amaitzeko.
Gaur egin dute ekitaldi horren aurkezpena Maritxu San Pedro eta Mertxe Lagunak. San Pedrok aurreratu duenez, zerbait berezia egiteko asmoa dute San Juan plazan, baina dena eguraldiaren araberakoa izango da.
Indarkeria matxistaren kontrako egunean, emakumeen kontrako eraso gehiago ez dutela nahi aldarrikatuko dute, besteak beste. Herritar guztiei deia egin diete kalera ateratzeko.
Aurretik, 19:00etan, azaroaren 25aren harira egingo duten elkarretaratze instituzionalean parte hartuko dute. Hori ere Zabaltza plazan izango da. Horrez gain, hilabete osoan zehar ari dira ekintzak egiten indarkeria matxistaren kontrako egunaren testuinguruan.
Biktima eta erasotzaileen ahotsak
Bidasoaldeko Elkarte Feministaren eskutik, abenduaren 2an (ostirala) proiekzio eta hitzaldi bat egingo dute 19:30ean, Ospitale Zaharreko hitzaldi aretoan. Bertan parte hartuko du Lidia Martin dokumental baten egileak. Batetik, indarkeria matxistaren biktimak elkarrizketatu ditu, baina beste ikuspegia, erasotzaileena ere bildu du, eta elkarrizketak egin dizkie espetxean diren erasotzaileei.
Maritxu San Pedro eta Mertxe Laguna azaroaren 25eko manifestazioaren aurkezpenean.
Erlazionatutako edukiaAzaroaren 25ari begira indarrak elkartu dituzte
