Indarkeria matxistaren kontrako konpromisoa berretsi du Irungo Udalak
Indarkeria matxista saihesteko tresna nagusiak genero ikuspegia ezartzea eta diskriminazioa debekatzea izan behar dutela adierazi du udalak adierazpen instituzionalean. Alderdi guztiek sinatu dute EH Bilduk izan ezik.
Indarkeria matxistaren kontrako egunaren harira, Irungo Udalak adierazpen instituzionala atera du, eta alderdi guztiek sinatu dute EH Bilduk izan ezik. Bertan, emakumeen kontrako indarkeria saihetsi eta salatzeko konpromisoa agertu du udalak, eta Istanbulgo Hitzarmenarekin bat egiten duela berretsi du.
Udalak gogorarazi duenez, 2011n onartu zuten Europako Batasuneko herrialdeek hitzarmen hori, eta hori indarkeria matxistaren kontrako lehen tresna juridiko eta nazioarteko itun garrantzitsuena dela esan du.
Hitzarmena betearazteko bidean, zenbait neurri hartuko dituela esan du udalak, eta hala nola, indarkeria matxista saihesteko bidean genero ikuspegia ezarri eta diskriminazioa debekatuko duela adierazi du. Bide beretik, gizartean ere eragin nahi du, eta gizarteak berak indarkeria matxista saihestu eta aurre egitea bultzatuko duela esan du. Horretarako, berdintasun politikak sustatzeko konpromisoa azaldu du, eta eraso matxisten kontrako protokoloak eta erantzun soziala egotea bultzatu.
Horrez gain, emakumeen kontrako indarkeria ezberdinak identifikatu eta horiei aurre egiteko neurriak hartuko dituela azaldu du, eta emakume talde nahiz talde feministekin lan egiteko prest azaldu da. Neurri horretan, finantzatzeko bermatzeko mekanismoak martxan jarriko dituela ere gaineratu du.
Azkenik, bihar, 19:00etan, Zabaltza plazan antolatu duten elkarretaratzean parte hartzeko deialdia egin diete herritarrei.
Azaroak 25
