Alarde tradizionala babesten dutenak "suminduta" daude azaroaren 25aren harira zabaldutako mezuekin
"Gezurrak eta demagogia erabiliz" alarde baztertzailea eta indarkeria matxistaren kontrako eguna lotzen ari direla esan dute.
“[Espainiako] Auzitegi Gorenak argi utzi zuen gure desfilea guztiz legala dela eta ez dela diskriminaziorik egiten genero edo ezberdintasun arrazoiengatik”, adierazi dute alarde tradizionalaren hainbat babeslek. Azaroaren 25aren testuinguruan, emakumeei soldadu gisa desfilatzea ukatzen dien alardea indarkeria matxistaren kontrako egunarekin lotzen dituzten mezuak zabaldu dituztela esan dute, eta horren aurrean “suminduta” azaldu dira.
Horrez gain, iritzi diote “emakumeen gehiengoak, herriaren gehiengoarekin batera”, babesten dutela alarde tradizionala, eta erabaki hori “modu kontzientean eta askatasunez” hartu dutela.
Emakumeen kontrako indarkeria desagerraraztea “helburu komuna” dela gogorarazi dute, “eta ezin dira pitzadurak sortu arazoa konpontzeko zerikusirik ez duten interesengatik”
Edonola ere, emakumeen kontrako indarkeriaren aurrean “gaitzespen indartsuena” adierazi du, eta euren jardueraren eremuan hori saihesteko konpromisoa agertu dute. Ostiral honetan azaroaren 25aren harira udalak antolatu duen elkarretaratzean parte hartuko dutela esan dute.
Testu hori sinatu dute alarde tradizionaleko Buruzagien Batzordeak eta Alardearen Batzordeak, eta Emakume Irundarrak, GordeZAN, Pagoki eta Mugarriluze elkarteek.
Alarde Tradizionaleko artxeroak
Erlazionatutako edukiaAzaroaren 25ari begira indarrak elkartu dituzte
