Erreka garbitu eta drainatu dute. Gaur eta bihar ikusiko da emaitza, euri asko espero baita.
![Erribera Kosta](http://bidasoa.hitza.eus/site/files/2016/11/Erribera-800x500.jpg)
Bazterrak garbitu dituzte eta lohia drainatu
Hondarribiko Udalak Puntaleko itsasoratzea hobetu du, euriteeekin ur gainezka egiten zuen baratza eremuaren egoera hobetzeko. Jaizkibel menditik datorren eta Puntalean itsasoratzen den Erriberako errekan egin ditu lanak, Kostan, eta 5.000 euroko aurrekontua izan dute.
Erriberako erreka garbitu eta drainatu dute, aireportu parean. Bi hilabete aritu dira lanean eta emaitzak segituan ikusiko direla uste du udalak. Izan ere, garbitu duten eremua, euriteekin erraz inundatzen ziren lurrak direla jakinarazi du Kalixa Silanes Nekazaritza eta Ingurumeneko zinegotziak: “Lanak asko laguntzen digu eremua antolatzen. Lortu dugu baratzeak urez ez betetzea, hala gertatzen baitzen lehen euriteak zeudenean. Iaz aireportu ondoan esku hartu zen, eta aurten beste urrats bat eman dugu, Erribera-Kostako eremua hobetu baitugu”. Oraindik eremuan hobetzeko zer badutela onartu du Silanesek.
Udalak egin ditu garbiketa lanak, baina bizilagunen oniritzia bilatu dutela argitu du Silanesek: “Udalak egindako lana da, baina bizilagun eta jabeen oniritzia izan du, beraiek baitute bere sailak mantentzeko ardura”. Halaber, erabiltzaile guztien lankidetza eskatu du zinegotziak, “denon onura bilatuz, eta ez bakoitzarena”.
Abisu horia, gaurko
Eusko Jaurlaritzako Segurtasun Sailak abisu horia ezarri du gaurko eta biharko, Kantauri isurialdean. Hain zuzen ere, “prezipitazio txiki-ertaina” egingo duela iragarri dute, “oso ugaria eta iraunkorra”. Arratsaldeko 6etan hasiko da abisu horia eta, printzipioz, 24 orduz luzatuko da. Zenbait lekutan metro koadroko 60 litro baino gehiago pilatu daitezkeela uste du Segurtasun Sailak.