Abenduaren 1ean egingo dute Maurice Ravel aretoan. Hondarribian, hiru lekutan eman daiteke izena.
![Mintzodromoa 2015](http://bidasoa.hitza.eus/site/files/2016/11/DSC_0060-800x500.jpg)
Iaz Hondarribian egin zuten Sareuskaren mintzodromoa, Itsas Etxean
Donibane Lohizunen egingo da Sareuskaren aurtengo Mintzodromoa, abenduaren 1ean, eta dagoeneko izena eman daiteke hara joateko. Euskararen Eguna larunbata izanik, ostegunera aurreratu dute ekitaldia. Maurice Ravel aretoan egingo dute, 10:00etan hasita.
Hondarribian izena eman nahi dutenek, Euskara Zerbitzuan (943 11 12 24 zenbakian), Udal Euskaltegian edo Biztanlearen Arreta Zerbitzuaren (BAZ) bulegoan egin dezakete. Hilaren 28a da horretarako azken eguna.
Antolatzaileek jakinarazi dutenez, hainbat pertsonai ezagunek izena emanda dute dagoeneko, hala nola, Maialen Arzallus bertsolariak, Peio Ospital abeslariak edota Kalakan musika taldeko kideek.
Sareuskak antolatua
Hego Lapurdiko Hiriguneak, Bortzirietako Euskara Mankomunitateak eta Bidasoa-Txingudi Mugaz Gaindiko Partzuergoak osatzen dute Sareuska. 2014 urteko irailean eratu zuten sarea, euskararen erabilera eta sentsibilizazioa landu, euskara zerbitzuen eta euskararen gaineko ardura duten hautetsien arteko elkarlana bultzatu eta euskararen ikusgarritasuna lantzeko helburuekin.
Helburu horiek gauzatzeko 2017 urtera arteko plana adostu zuten, eta ekintza zehatzen artean dago aurten hirugarrenez egingo den Mintzodromoa. Lehen ekitaldia Irungo Txanaleta plazan egin zuten, bigarrena Hondarribiko Itsas Etxea Auditoriumean (irudian), eta hirugarrena, aurten, Donibane Lohizunen.