Cortes Amunarrizek lan sarituenak proiektatuko ditu etxean
Hondarribiarrak hainbat sari jaso ditu LGTB gaia lantzen duten lanengatik. Errenteriako Film Laburren Jaialdiko zuzendari onena izendatu berri dute.
Madrilen bizi den Jose Antonio Cortes Amunarriz hondarribiarraren lau film labur proiektatuko dituzte ostiralean Itsas Etxea Auditoriumean, 20:00etan. Aurreko igandean Errenteriako XXI. Film Laburren Jaialdian zuzendari onenaren saria jaso du Cortesek, iaz errodatutako No es nada filmagatik.
Hain zuzen ere, Errenterian aurkezturiko No es nada filma izango da Itsas Etxean ikusi ahalko den lanetako bat. Besteak, Adán y Esteban (2011), Desnudos (2013) eta Último pase (2014) dira.
Cortesen film laburrek hainbat sari jaso dituzte gai sozialak eta bereziki LGTB gaiak lantzen dituzten jaialdietan. Lau ikus-entzunezkoen artean Desnudos da sari gehien bildu dituena, hamabi guztira. Besteak beste, Norfolkeko (Virginia, AEB) Reel It Out Queer Film Festival-eko film labur onenaren eta publikoaren sariak, Monbaiko (India) Kashish Mumbai International Queer Film Festival-eko lehen saria, Madrilgo Lesgaicinemad jaialdiko publikoaren saria, eta Bilboko XI. Nazioarteko Zinegoak Jaialdiko bigarren saria jaso ditu hondarribiarraren Desnudos film laburrak.
‘Desnudos’ film laburreko fotograma bat
