'Ezagutu zure hiria' programa itsasora mugituko da
Ramon Iribarrenen ondarea landuko dute aste honetan eta larunbateko bisita gidatua barkuz egingo dute.
Itsasoz egingo dute Ezagutu zure hiria programako hurrengo bisita gidatua. Aste honetan egingo dute Arma Plaza Fundazioaren programako azaroko ekitaldi bikoitza, ostegunean hitzaldia, eta larunbatean bisita.
Oraingoan, Ramon Iribarren itsas ingeniariaren lana aztertuko dute eta Ernesto Goirizelaia arduratuko da horretaz. Goirizelaiak prestatu du osteguneko hitzaldia, eta ohi bezala, Arma Plaza kultur eta turismo guneko goiko solairuan izango da, 19:00etan.
Eta larunbatean, Goirizelaia bera gidari izango delarik, bisita gidatu berezia egingo dute, itsas ontzitik bisitatuko baitute Iribarrenek diseinatutako babes azpiegitura, Hondarribiko barra. 11:00etan abiatuko da barkua kirol kaiko M pantalanetik. Bisita doan da, baina tokiak mugatuak dira eta lehenbailehen izena ematea komeni da. Telefonoz (943 64 36 77 zenbakian) edo posta elektronikoz egin daiteke.
Arma Plazak gogorarazi duenez, “hiritar guztiei zuzenduriko ekimena” da Ezagutu zure hiria programa, Hondarribiko historia hondarribiarrei ezagutzera emateko helburua duena.
Hondrribiko barraz jardungo du hitzaldiak, eta barkuz bisitatzeko aukera izango da
