2017ko aurrekontu parte-hartzaileen proposamenak aurkeztu dituzte

Bilera presentzialetan mahaigaineratu diren hamalau proposamen pasatu dira azken fasera. Internet bidez jasotako beste hamabi aukeratuko dituzte.

Erik Gartzia

Irun

2016/10/20

Atzo elkartu ziren proposamenei buruz eztabaidatzeko.

Datorren urteko aurrekontu parte-hartzaileen aurkezpen fasea itxi zuten atzo. Hirugarren saioa egin zuten atzo ospitale zaharrean, eta bertara hurbildutakoek eramandako proposamenak aztertu zituzten. Hamabost bat lagun hurbildu ziren, eta hiru taldetan banatu ziren. Proposamen guztiak mahaigaineratu zituzten, eta horietatik hamalau atera ziren aurrera, botoa eman ondoren. Honakoak dira hautatutako proposamenak:

Udal ludoteka sarearen hobetzea: Dunboa-Arbes zonaldean bat irekitzea eta asteko ordutegia hogei ordura zabaltzea (hamar boto).
Herri kirolei zuzendutako espazio ludiko bat irekitzea Gain-Gainean parkean (bederatzi boto).
Kulturari 100.000 euro gehiago bideratzea, eta antzerkia eta musika emanaldiak indartzea (zortzi boto).
Pertsonentzako —animaliarik gabeko— zona berdeak ezartzea (zazpi boto).
Emakumeen Etxe bat sortzeko proiektua martxan jartzea (zazpi boto).
Hamabi urtetik gora duten nerabeentzako lokal bat irekitzea, Erdigunean (sei boto).
Dunboa Herri Ikastetxeko tenis/saskibaloi kantxa estaltzea (sei boto).
Zebrabideak altxatzea, batez ere eskolen ondoan daudenak (bost boto).
Udalaren gizarte zerbitzu eta prestazioen eskaintza jasotzen duen eskuorria editatzea (lau boto).
Sanmartzialetan San Juan Arria eta Urdanibia plazetan komun gehiago jartzea (hiru boto).
Artian zaharrentzako gune sozial bat irekitzea (hiru boto).
Puianan komun publiko bat jartzea (bi boto).
Enbido kaletik Zarandona etxeetara arrapala eraikitzea (bi boto).
IRUN Factory sustatzea, sortzaile berrientzako baliabideak handituz (bi boto).

Ehun bat proposamen Bilera presentzialen fasea bukatuta, Internet bidez egindako proposamenen artean dozena bat hautatu beharko dituzte. 97 proposamen jaso dituzte, eta horietatik 53k pasatu dute galbahea. Hamabi proposamenak hautatzeko, Irun Txartela erabiliko beharko da, edo HAZ bulegotik pasatu. Hilaren 24tik 27ra egin beharko da hori. Behin boto guztiak zenbatuta, finalera pasako diren ideiak hautatuko dituzte. Azaroaren 2an bilera egingo dute, azken botazio horren nondik norakoak azaltzeko. Azkeenko botazioen epea azaroaren 4tik 10era izango da. Bestalde, gazteentzako aurrekontu parte-hartzaileei dagokionez, 43 proposamen jaso dituzte. Babestuenak aterako dira aurrera, 200.000 euroak agortu arte. 16 eta 30 urte arteko irundarrei dago zuzenduta.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.