Ostiralean itxiko dute Elkarrizketariak eta Mintzalagunan izena emateko epea
Internet bidez eman beharko da izena euskara ikasleei hizkuntza praktikan jartzea ahalbidetzen duten programetan.
Euskara praktikatu nahi duenak, Mintzalaguna edo Elkarrizketariak programetan har dezake parte. Ikasturte honetako jardueretan izena emateko epea ostiralean bukatuko da.
Mintzalagunan bospasei lagun elkartzen dira, euskara ikasten ari direnak euskara menperatzen duen batekin nahastuta. Euskara giro informal batean praktikatzen dute: kafe baten bueltan, erosketak egiten eta abar.
Elkarrizketariak programan, berriz, maila baxuagoa duten ikasleek hartzen dute parte. Hamabost egunean behin elkartzen dira, eta tailerrak eta ahozkotasun praktikak uztartzen dituzte. Interesa dutenek, Internet bidez eman beharko dute izena (Mintzalagunan izena emateko eta Elkarrizketariak-en).
