Lehiaketa antolatu dute eskubaloi klubak eta Bidasoako EKTk, letra onena bilatzeko. Ez dute itzulpen hutsa bilatzen. Euskararen Egunean aurkeztuko dute.
Sudupe eta Zabalo, lehiaketaren aurkezpenean.
Euskarazko ereserkia eduki nahi du Bidasoa eskubaloi klubak. Horretarako, lehiaketa antolatu dute, Bidasoako Euskal Kultur Taldearekin batera. Taldeko ordezkari Aritz Sudupe ordezkariak adierazi duenez, klubak aurrera daraman euskara planaren barruko beste urrats bat da euskarazko ereserkia izatearena.
Nabarmendu duenez, ez dute itzulpen soila bilatzen. “Badugu itzulpen tekniko bat, baina beste zerbaiten bila ari gara”, gaineratu du Sudupek. Horregatik, EKTrekin elkarlanean aritzeko ekimena izan zuten, euskararen arloan “kristoren lana ona egiten dutelako eta inplikatuta daudelako”.
EKTko Joseja Zabalok adierazi duenez, “onena” indarrak batzea da. Lehiaketarekin euskarazko sormena sustatu nahi dute, “hizkuntzak baduelako horretarako aberastasuna”. Hori bai, doinuak eta neurriak errespetatu beharko dira. Ereserkia entzun nahi duenak,
esteka sakatuta egin dezake.
Hilabeteko epea
Bihar zabalduko dute proposamenak aurkezteko epea, eta azaroaren 18an itxiko da. Idazlana klubaren egoitzara bidali beharko da posta bidez, edo klubaren buzoian bertan utzi (Kale Nagusia, 30, 20304 Irun. Gipuzkoa).
Idazlana sobre batean sartu beharko da, eta goitizena eta NAN zenbakia jarri beharko dira. Beste gutun batean, kanpoan, datu horiek idatzi beharko dira, eta barruko paper batean egilearen datuak eta harremanetarako telefonoa eta e-posta helbidea idatzi beharko dituzte.
Epaimahaiak baloratuko ditu originaltasuna, nortasuna eta Bidasoko sentimendua. Euskara batua edo bertako euskalkia erabil daiteke, zainduta. Letra egilearena izango da, baina erabiltzeko eskubidea izango du Bidasoa eskubaloi taldeak. Lehiaketaren antolatzaileek argi utzi nahi izan dutenez, gaztelerazko bertsioa ez dute bazterrean utziko.
Irabazleak 400 euro, arropa, txapela bat, afari bat eta Bidasoaren denboraldiko partidak ikusteko abono bat eskuratuko ditu.
Aurkezpena, Euskararen Egunean
Epaimahaia klubeko, EKTko eta Irunabar elkarteko kideek osatuko dute. Azaroaren 18tik 28ra bitartean deliberatuko dute, eta hil horren 29an jakinaraziko dute nor den saritua.
Abenduaren 3an aurkeztuko dute ereserki berria, Euskararen Egunean. Kasualitatez, arratsalde horretan Bidasoa-Irunek Benidorm jasoko du Artalekun, 19:00etatik aurrera. Bertara joateko gonbita luzatu dute, taldea animatzeko eta bertsio berria ezagutzeko.
