Bidasoko kontrabandoaren historia ezagutu dute hondarribiarrek
Rosa Arburua EHUko irakaslearen eskutik gau lanari buruzko informazioa jaso dute, 'Ezagutu zure hiria' egitasmoaren lehen saioan.
Ezagutu zure hiria zikloaren lehen saioa egin zuten atzo arratsaldean. Gaia Bidasoa eskualdean izandako kontrabandoa izan zen. Arma Plaza aretoa lepo bete zen Rosa Arburua Filosofian eta Hezkuntza Zientzietan doktorearen azalpenak entzuteko.
Bihar, berriz, bisita gidatua egingo dute Hondarribian zehar, Arburuarekin berarekin eta gai bera landuz. Izan ere, Ezagutu zure hiria zikloak hilero gai bat landuko du, eta ostegun batean hitzaldia emango dute eta bi egunetara bisita gidatua. Biharko bisita 11:30ean aterako da, Arma Plazatik. Izena emateko, Arma Plaza Fundazioaren egoitzatik pasatu behar da, 943 64 36 77 telefono zenbakira deitu edo mezu elektronikoa bidaliz.
Azaroko gaia aurreratu du fundazioak. Herriko espigoien eta Ramon Iribarren zenari buruzkoa izango da. Ernesto Goirizelaia ikerlari hondarribiarrak gidatuko ditu hitzaldia eta bisita gidatua. 
