Fenomena Hondarribia, Alde Zaharra dantzan jartzeko

Fenomena Kultur Elkarteak egun osoko jaialdia antolatu du larunbaterako.

Asier Perez-Karkamo

2016/10/04

Fenomena Hondarribia. Loco Sound of Teppaz

Loco Sound of Teppaz (arg: Pierre Wetzel)

Bi eszenatoki eta bost talde, horietako bi atzerrikoak. Fenomena Kultur Elkarteak indartsu aurkeztuko du bere burua larunbatean, hilak 8, udalaren laguntzarekin antolatu duen Fenomena Hondarribia rock musika jaialdiarekin. Bost talde eta jaialdian marka utziko duen haurrentzako tailer bat, egun osoz Alde Zaharreko adokinak rock doinuez astintzeko. Bost taldek joko dute Fenomena Hondarribia jaialdiaren lehen ekitaldian. Ez da gutxi, baina edozeinek izango du denak ikusteko aukera. Izan ere, bi eszenatoki desberdinetan joko dute, Apezpiku plazan hiruk eta Kasino Zaharreko lorategietan beste biek, eta kontzertu eta kontzertu artean atseden luzeak izango dira. Egun osoko festibala izango da Fenomena Hondarribia, goizetik hasi eta gauerdiraino iraungo duena. Egitaraua ikusita, Fenomena elkarteak rock musika bere osotasunean ulertzen duela argi geratu da. Ederra izateko itxura du.

Fenomena Hondarribia. Urriak 8

11:00etan, Apezpiku plazan. Haurrentzako tailerra Santamariamadalenaren eskutik. Kontzertuen guneak apaintzeko tailerra izango da.
12:00etatik 15:30era, Apezpiku plazan. Loco Sound of Teppaz DJa (Bordele, Okzitania). 60. hamarkadan erabiltzen ziren azpiegitura eta tresneria erabiltzen ditu, eta garai hartako rock doinuak nahasten ditu, boogaloo, rock and roll, garage…
16:00etan, Kasino Zaharrean. Everybody here wants you (Ordizia). Jeff Buckley zenak 1994an grabatutako Grace diskoa omentzeko sortutako taldea. Ahotsari dagokionez, zailtasun handiko erronka da Grace diskoko abestiak katatzea.
17:15ean, Apezpiku plazan. Mandela Selektah (Lakuntza). Bi orduko maisu eskola Australiako rock musikari buruzkoa. Antipodetako musika ezagutzeko eta munduan izan duen eragina ezagutzeko aukera izango da.
19:15ean, Kasino Zaharrean. Joseba Irazoki eta Lagunak (Bera). Aurkezpenik behar ez dituen multi-instrumentista eta abeslari bikaina. Bakarka aritzeko gai den arren, Hondarribira banda formatuan hurbilduko da.
21:00etan, Apezpiku plazan. Don Loope (Mexiko). 1970.eko Afro beat eta groove doinuak entzungo dira, musika beltza eta indiarra uztartuz.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.