Amute-Kosta prest dago jaietarako
Ostiral afalosteko 'Zenbat dakizu?' jokoa, herri bazkaria eta igandeko estropada nabarmentzen dira, haurrentzako egitarau zabalarekin batera.
Asteburuan egingo dituzte Amute-Kosta auzoko jaiak, urteko azkenak Hondarribian, eta auzoko festen artean handienak. Izan ere, hogeitik gora ekitaldi antolatu ditu auzo elkarteak, udalaren laguntzarekin (ikusi egitaraua)
Denetarik eta denentzako egongo da, haurrentzako jolasak, kirol jarduerak, musika, otorduak… Zaila da egitaraua hartu eta bertatik zerbait nabarmentzea baina, azken urteetan gertatutakoari erreparatuz, honako hauen arrakasta bermatuta dago: ostiral arratsaldeko haurren jokoak, afalosteko Zenbat dakizu? galdera jokoa, larunbateko herri bazkaria eta ondorengo dantzaldia, gaueko musika emanaldia, eta noski, igandeko estropadak. Aurten mareen kontua dela-eta, arratsaldez egingo dute Amute-Kostako Traineru Estropada; irudi eskubideak direla-eta Euskal Telebistak ez du proba zuzenean emango, baina lehia gogorra espero da auzotarren artean.
Larunbatean egingo den herri bazkaria salbu —9 euro ordaindu behar dira—, Amute-Kostako jaietako gainontzeko ekitaldi guztiak debalde dira. Horregatik, auzo elkarteak hondarribiar guztiei luzatu die gonbitea, asteburuan haiekin auzoko festez gozatzera hurbildu daitezen.
Ostiral arratsaldea haurrentzat izango da, baina asteburuan ere dute ondo pasatzeko aukera
