Adinekoak bakarrik ez
Programa horren bidez, 75 urteko herritarrei eurentzat Irunen dauden zerbitzu eta ekintzen berri eman nahi diete, eta bakardade egoerak saihestu.
Irungo Udalak Hurkoa fundazioarekin elkarlanean programa bat martxan jarriko du. Horren bidez, hauskortasun egoeran dauden 68 urtetik gorako pertsonak bilatu nahi dituzte, eta euren beharrei erantzuna eman. Horrelako programarik ez da aurretik egin EAEn.
Proiektu hori 68 urtetik gorakoei zuzenduko zaie, etxean bizi direnak, familia babesik ez dutenak, eta norbaiten laguntza behar dutenak euren ongizaterako. Horren bidez, euren autonomia handitu, euren beharrei erantzun eta arrisku, tratu txar eta bazterketa egoerak ekidin nahi dituztela esan du udalak.
Esperientzia pilotua izango da, eta hamabost lagunekin egingo dute, programak bilatzen duen profilarekin bat egiten dutenak. Bakoitzarentzat plan zehatz bat eramango dute aurrera, eta aldizka ebaluatu egingo dute. Pertsona bat egongo da adinekoei laguntzen, eta konpainia egiteaz gain, egoera zehatzetan laguntza emango diete, medikura joaten edo tramiteak egiten, udalak azaldu duenez.
Eskutitzak, etxez etxe
Udalak badu dagoeneko adinekoen isolamendu egoerak saihesteko programa bat martxan. Horren bidez, 75 urteko herritarrei eurentzat Irunen dauden zerbitzu eta ekintzen berri eman nahi diete, eta bestalde, bakardade arriskuan daudenei tailer batzuk eskaini, ezagutza eta trebetasun sozialak sustatzeko.
Horretarako, datozen egunetan eskutitzak banatuko dituzte etxez etxe. Ondoren, Gizarte Ongizate saileko pertsona bat harremanetan jarriko da elkarrizketa bat egiteko ordua jartzeko.
Sergio Corchon Gizarte Ongizate saileko arduradunak jakinarazi du harreman sozialak mantentzea eta ekintzak egitea oinarrizkoa dela hauskortasun edo ahulezia sozial egoerak edota dependentzia egoerak saihesteko.
Adinekoak
