Euskara ikasteko aitzakiarik ez
Udalak iazko ordainketa sistema mantenduko du, eta horrez gain, bekak eta langabeentzako debaldeko programa eskainiko ditu.
Irungo euskaltegiak 2016-17 ikasturtea prestatzen ari dira, eta aurtengo ikasturtean ere maila guztiak eskainiko dituzte, euskara ikasteko hainbat erraztasun jartzeaz gain.
Udal euskaltegiari dagokionez, dagoeneko matrikula egin daiteke hilaren 21a bitartean. Bertan, HABE azterketa ofizialak prestatzeko ikastaroak eskainiko dituzte, baita gurasoentzako, enplegu publikoan sartzeko, mintzatzeko taldeak eta beste herrialdeetatik datozenei begira antolatzen diren AISA ikastaroak ere.
Ordainketari dagokionez, iazko tasa sistema mantendu dutela jakinarazi du udalak. Hala, zenbat eta eskola ordu gehiago egin, orduan eta merkeago izango da matrikula, %35 merkeago ere izan daiteke.
Langabeek euskara debalde ikasteko aukera izango dute, Lannahi programaren bidez. Datorren ikasturtean bost txanda izango dira, hiru ikasturtean zehar (goiz eta arratsaldez) eta bi udan (goizez). Mailaren arabera egingo dituzte taldeak.
Horrez gain, euskara ikasteko bekak ere eskatu ahal izango dira. Udalak 58.569 euroko diru poltsa bideratuko du beka eskatzen dutenentzat, eta matrikula gastuen %100 artekoa izan daiteke beka.
Izena emateko udal euskaltegitik pasatu daiteke (Urdanibia plaza 5). Informazio gehiago nahi izanez gero, 943 50 52 73 telefono zenbakira deitu edota email bat bidal daiteke.
Herri Jakintza eta AEK-ko eskaintza
Herri Jakintza euskaltegian matrikula bihartik hilaren 27ra arte egin ahal izango da. Maila guztiak eskaintzen ditu: HABE titulu ofizialak prestatzeko, EGA, enplegu publikoa, IRALE, hizkuntza eskakizunak prestatzekoak, guraso eta mintza taldeak… Herri Jakintza euskaltegia Nafarroa Hiribideko 13. zenbakian dago, eta hor eman daiteke izena (11:00-13:00 eta 17:00-19:00). Informazio gehiago 943 63 52 66 telefono zenbakian eta emailez.
AEK euskaltegian ere eskaintza zabala eskaintzen dute: maila guztiak, HABE, enplegu publikoa, Osakidetza, IRALE, online (C1 eta C2), autoikaskuntza, gurasoei begirako taldeak, mintzamena lantzeko taldeak, merkatariak… Kasu honetan, matrikula hilaren 12tik 29ra izango da. AEK-tik (Legia 6) pasatu daiteke (10:00-14:00 eta 17:00-19:00) eta informazioa nahi izanez gero, 943 62 88 34 telefono zenbakira deitu.
Udal euskaltegiaren ataria
