Gaur eta bihar salduko dituzte herri bazkariko txartelak
Arrantzale Egunean kukaña egingo dute Bentan eta HITZAk erorketa onenaren saria banatuko du.
Hilaren 10ean, Arrantzale Egunean Bentako karpan egingo den koadrilen herri bazkarian parte hartu nahi dutenek, gaur eta bihar erosi beharko dituzte txartelak. Gazte Informazio Bulegoan salduko dituzte, 18:30etik 20:00etara, 18 euroan.
Bidasoaldeko EKT ari da bazkaria antolatzen, eta ez bazkaria bakarrik, baita Arrantzale Egunean egingo diren beste hainbat ekitaldi, horien artean kukaña lehiaketa. Iaz berreskuratu zuen kukaña EKTk, eta aurten bigarrenez egingo dute, lehen aldiz Arrantzale Egunean —iaz Baserritarren Egunean egin behar izan zuten—.
Goizeko 11:00etatik aurrera egingo dute eta izen emateko aukera ordu erdi lehenago irekiko dute, Bentan egingo duten gosariarekin batera. Hainbat sari izango dituzte kukaña lehiaketan banatzeko, horien artean Oarso Bidasoko HITZAk erorketa onenari emango diona.
Julen Ansak irabazi zuen iaz HITZAren erorketa onenaren saria
Koadrilen bazkariko egitaraua
- 10:30. Kuadrillentzako gosaria eta kukañaren izen ematea.
- 11:00. Kukañaren hasiera.
- 13:30. Txarangaren animazioa.
- 14:00. Kalejira Zabalaren Txokotik herri bazkarira. Kuxkuxtu txarangaren animazioa.
- 14:30. Herri bazkaria, Bentako estalpean.
- 17:00. Hondarribiko Elektro-Patxaranga.
- 18:00. Kantu animazioa Portuan, Kuxkuxtu txarangarekin.
