Munduko Kopako hirugarrenean lehiatuko dira Areitio eta Susperregi
Bi proben ondoren, sailkapeneko hirugarren postuan dago Ion Areitio, eta postu horri eutsi nahiko dio.
Bike-trialeko Munduko Kopako hirugarren proba egingo dute asteburuan Austriako Vocklabruck herrian, eta bertan lehiatuko dira Ion Areitio eta Gorka Susperregi hondarribiarrak. Areitiok aurreko bi probetan erakutsiriko erregulartasuna berretsi nahiko du, sailkapen nagusiko hirugarren postuari eusteko.
Maiatza bukaeran hasi zen Munduko Kopa, dagoeneko klasiko bilakatu den Krakoweko (Polonia) probarekin. Aurreko urtea min hartuta pasatu eta gero, bikain lehiatu zen Areitio aurtengo estreinaldian eta hirugarren postua eskuratu zuen, Benito Ros nafarraren eta Rick Koekoek holandarraren atzetik.
Bigarren proba uztailaren bigarren asteburuan egin zuten Alpeetako Les Menuires herrian (Frantzia). Dominik Oswald 19 urteko alemaniar gazteak ezustekoa eman zuen —Polonian 9. izan zen— eta podioko lehen koskara igo zen, Ros nafarrarekin berdinduta, baina average hobearekin. Hirugarren Mustieles sailkatu zen eta Areitiok laugarren postuan bukatu zuen proba, behin behineko sailkapen nagusian hirugarren postua mantenduz. Gorka Susperregik 40. postuan bukatu zuen Les Meniereseko proba, Polonian azaldutako maila ezin berretsita.
Espainiako Txapelketan, hirugarren
Les Menuireseko Munduko Kopako probaren ondoren, eta Austriakoa prestatze aldera, Castillo de Lorcara (Murtzia) bidaiatu zuten bi hondarribiarrek Espainiako Txapelketara. Bertan, hirugarren postua lortu zuen Areitiok, Mustielesen eta Rosen ondoren. Susperregi Elite Mailan lehiatu zen lehen aldiz eta zortzigarren sailkatu zen.
Dominik Oswald alemaniarrak ezustekoa eman zuen Les Menuiresen (arg: Marco Patrizi)
Erlazionatutako edukiaKrakoweko podioa zapaldu du Ion Areitio hondarribiarrak
