[Aurrerapena] Droga laborategi bat desegin dute Hondarribian
Hilaren 7tik zortzi pertsona atxilotu eta 80 kilo speed atzeman dituzte, Hondarribian hasitako polizia operazioan.
Ertzaintzak droga laborategi bat desegin du Hondarribian eta zortzi pertsona atxilotu bertan, Irunen eta Donostian, uztailaren 7an hasi eta bi astez luzatu den operazio baten barruan. Operazioan, 80 kilo speed, 20 kilo haxix, 60 landarez osaturiko marihuana landaketa bat eta beste zenbait substantzia atzeman dituzte, baita 15.000 euro ere. Segurtasun sailaren arabera, atzemandako drogak 1,5 milioi euroko balioa izango luke kalean.
Atxilotutako zortzi pertsonetatik zazpi espetxeratu dituzte eta beste bat libre utzi dute, baina hamabost egunero epailearen aurretik pasa beharko da. Lehen hiru atxiloketak, uztailaren 7an burutu zituen Ertzaintzak Hondarribiko etxebizitza batean. Bertan, droga manipulatzeko laborategia aurkitu zuten, tresneria guztiekin, eta taldeko burua eta beste bi kide atxilotu zituzten. Etxean, hainbat kilo speed, 7.000 euro metalikoan, billeteak zenbatzeko makina bat eta 42 sakelako telefono.
Hurrengo egunetan beste bost pertsona atxilotu dituzte Irunen eta Donostian, eta hamar etxebizitza eta hainbat ibilgailu miatu, haien artean Hondarribiko Alde Zaharreko etxebizitza eta garaje bana eta herrian aparkatuta zegoen mobil-home bat.
Une honetan Segurtasun saila operazioaren berri ematen ari da Oiartzungo ertzain etxean, eta xehetasun guztiak argituko dituzte.
