Hiru dira arma zuriz zauritutakoak

Bi pertsona anbulantziaz eraman dituzte, horietako bat larri, eta hirugarren bat bere kabuz joan da erietxera.

Asier Perez-Karkamo

2016/07/17

Polizia zientifikoaren unitateko kideak, gertatutakoa ikertzen.

Hiru dira dagoeneko gaur goizaldean Foru kalean izandako liskarrean arma zuriz zaurituta erietxean artatu dituzten pertsonak. Zazpiak aldera izan da borroka, Hondarribiko Hondartza auzoan dagoen Q Hondarribia diskotekaren kanpoan. Arma zuriz eragindako zauriak zituzten bi pertsona anbulantziaz eraman dituzte ospitalera eta, ondoren, hirugarren bat bere kabuz joan da erietxera. Goizez Segurtasun sailak HITZAri azaldu dionez, dantzalekutik atera diren pertsona batzuen artean izan da liskarra. Horietako batek besoan zuen labankada, eta Bidasoaldeko Ospitalera eraman dute. Beste pertsona batek lepoan eta bizkarrean zituen arma zuriz egindako zauriak, eta Donostia Ospitalera eraman dute larri. Ebakuntza egin behar izan diote eta Zaintza Bereziko Unitatean dago. Hirugarren lagun bat bere kabuz hurbildu da osasun zentrora. Segurtasun sailak arratsaldean jakinarazi duenez, Donostia Ospitalera joan da hirugarren pertsona hori, eskuan labanaz egindako zauria zuelarik. Hatzean ebakuntza egin diote. Ikerketa irekita dago Liskarra handia izan denez, Ertzaintzaren polizia zientifikoaren unitateak eremu handi bat itxi behar izan du ikerketa burutzeko. Batez ere, dantzalekuaren kanpoaldean ibili dira arrastoen bila, han hasi baita borroka, eta errepidearen alde horretan ezin izan dute ibili autoek eguerdira arte. Baina pareko espaloian, kiroldegiko bizikletak aparkatzeko lekuaren ingurua ere itxi dute. Hori bai, alde hori ez dute trafikora itxi eta autoek ibiltzeko aukera izan dute, oso motel bada ere. Oraindik ez dute inor atxilotu, baina Ertzaintza gertatutakoa ikertzen ari da. Segurtasun sailak zehaztu duenez, liskarra eragin dutenak ez dira hondarribiarrak, “eta ezagunen artean izan da borroka”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.